Уһук Илин регионнарга бэриллэр “биир гектарынан” сир ылбыт 71 киһи учаастактарыгар инфраструктураны оҥостоллоругар судаарыстыбаттан көмөнү ыллылар. Бу туһунан бүгүн Уһук Илин регионнарга РФ бэрэсидьиэнин боломуочуйалааҕа, вице-премьер Юрий Трутнев Дьокуускайга суруналыыстары кытары көрсүһүүтүгэр бэлиэтээтэ.
Юрий Трутнев Дьокуускайга бу кыһын кэлэ сылдьан Саха сиригэр “биир гектарынан” туһанан дьон быраҕыллыбыт бөһүөлэги сөргүтэн эрэллэрин истэн биһирээн барбыта. Итини санатан туран, кини: “Бу саҕалааһыны үөрэ истибиппит уонна кинилэргэ хайаатар да көмөлөһөр суолу тобулуохха наадатын бэлиэтээбиппит. Кырдьыгын эттэххэ, оччолорго бүддьүөт ханнык да таһымыгар итиннэ анаан үбүлээһин суоҕа. ол эрээри бэйэбит эппиэтинэс ылынан көмөлөһөр суолу көрдөөн барбыппыт. Ол түмүгэр билигин 71 киһи учаастагар коммуникация тардынан олорор. Онон судаарыстыба маннык саҕалааһыннары өйүөҕэ”, — диэн бэлиэтиир Юрий Петрович.
Бу маннык хамсааһын “биир гектар” бырагыраама көмөтүнэн тэриллибит, сөргөхсүтүллүбүт бөһүөлэктэргэ тарҕаныаҕа.
Аграфена КУЗЬМИНА, “Саха сирэ” хаһыат, edersaas.ru