Амма улууһугар сиртэн үүнээйини ылыыга биэс хаһаайыстыба («Амма» АУо, «Болугур», «Бөтүҥ», «Соморсун» кэпэрэтииптэр уонна «Абага» ХЭТ) үлэлииллэр.
Кинилэр саас бурдугу (сэлиэһинэйи, ньэчимиэни уонна эбиэһи) холбоон 3 тыһыынча 550 гектар бааһынаҕа ыспыттара. Улуус сүрүн агронома Николай Гаврильев кэпсииринэн, төһө да кураан буоллар, син ардаан, үүнүү наһаа куһаҕана суох.
– Быйыл хомууру арыый эрдэ, атырдьах ыйын 18 күнүттэн саҕалаан, күн бүгүн 1 тыһыынча 297 гектар бааһына бурдугун быһан, 2 тыһыынча 219 туонна туораах бурдугу хомуйан олоробут. Билиҥҥи туругунан, биир гектартан ортотунан 17,1 сэнтиниэр үүнүүнү ыллыбыт. Былаан быһыытынан, улуус үрдүнэн 4 тыһыынча 340 туонна бурдугу хомуйуохтаахпыт.
Саамай элбэх ыһыылаах хаһаайыстыбабыт «Амма» АУо 1 тыһыынча 610 гектар ыһыылаах. Онтон бүгүҥҥү туругунан, 952 гектар бааһына бурдугун быһан, 1 тыһыынча 788 туоннаны хомуйда, былаанын 91 % толордо. Билигин улуус киинин тэрилтэлэрин көмөлөһүннэрэн, бурдугун кууллуу, тааралыы сылдьар.
500 гектар ыһыылаах «Болугур» кэпэрэтиип 185 гектар бурдугун быһан, 170 туоннаны хомуйда. 564 гектар ыһыылаах «Абаҕа» хаһаайыстыба 100 гектар бурдугун быһан, 211 туоннаны ылла. 576 гектар ыһыылаах «Бөтүҥ» кэпэрэтиип 60 гектар бурдугун быһан, 60 туоннаны ылла. 300 гектар бааһыналаах «Соморсун» кэпэрэтиип ыһыыта хойукку буолан, хомуурга бу нэдиэлэ бүтүүтэ киирэр былааннаах. Улуус киинин тэрилтэлэрэ бурдугу кууллааһыҥҥа субуотунньуктуу сылдьаллар.
Раиса Сибирякова, «Саха сирэ», edersaas.ru