Бүгүн Пиэрибэй Маай! Дьиҥнээх сааскы бырааһынньык, сүрэх үөрэр, сүрэх ыллыыр! Дьол түстэнэр, Үлэ айҕалланар, Эйэ Холууба көтөр! Дьон бэйэ-бэйэлэригэр ис сүрэхтэриттэн эҕэрдэ маанытын этэллэр, үлэни уруйдууллар! Биир дойдулаахтарбыт эҕэрдэлэрин ааҕыаҕыҥ!
Күндү биир дойдулаахтарым!
Руслан Федотов, Саха сирин норуодунай дьокутаата:
— Эһигини аан дойду үлэлээн иитиллээччилэрин сомоҕолуур, өрүү чаҕылхай күннээх, сааскы чэбдик тыаллаах, ураты сырдык, кэрэ, сүргэбитин көтөҕөр Күөх Маайынан, Ил-Эйэ, Үлэ бырааһынньыктарынан ис сүрэхпиттэн итиитик-истиҥник эҕэрдэлиибин!
Саас кэлиитэ саха киһитигэр кэлэр кэскили түстүүр, кэрэни кэрэһэлиир. Бу күн үгэс буолбут бырааһынньыктааҕы сэлэлии хаамыы биһигини барыбытын түмэр, олохпут тупсарыгар, киэркэйэригэр эрэл санаа саҥалыы саҕыллар уонна салгыы сайдарбытыгар ис кыахпыт эрчимэ тэтимнэнэр.
Ыам ыйын 1 күнэ – Арассыыйа кэрдиис кэмнэрин, уларыта тутууларын кытта ситимнээх дириҥ ис хоһоонноох бырааһынньык. Билиҥҥи кэмҥэ ыраас халлаан, иллээх, эйэлээх олох суолтата өссө күүһүрдэ. Бу быһаарыылаах, уустук күннэргэ дойдубут Бэрэсидьиэнин тула бука бары түмсэн, кэскиллээх көҕүлээһиннэри өйөөн, хардарыта өйөһөн, дойдубут чэчирии сайдарын туһугар үлэлиэх-хамсыах тустаахпыт. Туруоруллубут соруктары ситиһиэхпит, олохпут таһымын үрдэтиэхпит диэн бигэ эрэллээхпин.
Күндү биир дойдулаахтарым! Ыам ыйын ыраас халлаанын курдук киэҥ-куоҥ санааланыҥ, күлүмүрдүүр күнүн курдук кэрэ мичээр аргыстаныҥ, тулаҕытыгар үөрүү, дьол толору буолуохтун! Уҕараабат эрчими, чэгиэн-чэбдик туругу баҕарабын. Барыгытын үтүө санаа уонна дьол-соргу арыаллаатын!
Күндү доҕоттор, Күөх Маайынан!
Сахаайта Мойтохонова, Дархан этээччи, Үөһээ Бүлүү олохтооҕо:
— Сылаас, сырдык күннээх ыам ыйын маҥнайгы күнүнэн тапталлаах Сахам сирин олохтоохторун истиҥник эҕэрдэлиибин!
Бу дьоллоох үтүө күҥҥэ санаабыккыт сатаннын, толкудаабыккыт тобулуннун, кэрэхсээбиккит кэрэ буоллун. Элэккэй-сайаҕас буолуоххайыҥ, кыраттан да үөрүнньэҥ буолуоххайыҥ, мичээр аргыстаах сылдьыаххайыҥ. Ыраас халлаан курдук киэҥ-куоҥ санааланыаххайыҥ, саҥа тыллан эрэр сибэкки курдук өрүү эдэр буолуоххайыҥ, бу саҥа тыллан эрэр аар тайҕам курдук күүстээх, бөҕө тирэхтээх буолуоххайыҥ! Инникигэ киэҥник хардыылаан сайдыылаах суолу тутуһуоххайыҥ, оҕолорбут, сиэннэрбит дьоллоох күлэр саҥалара дуораһыйа иһиллэ турдун. Эйэлээх олоҕу, кыайыылаах-хотуулаах үлэни ис дууһабыттан баҕарабын. Олохпутун күүскэ да күүскэ таптыаххайыҥ, тоҕо диэтэххэ, биһиги сарсыҥҥыга эрэллээхпит!
Табаарыстар, Пиэрибэй Маайынан!
Савва Михайлов, КПРФ Дьокуускай куораттааҕы салайааччыта, СӨ нэһилиэнньэ дьарыктаах буолуутун государственнай кэмитиэтин бэрэссэдээтэлин солбуйааччы:
— Ыам ыйын 1 күнэ хас биирдии киһиэхэ саамай сырдык, маассабай бырааһынньык. Бу күн дьиҥ суолтата — үлэһит дьон сомоҕолоһуутун уруйдуур күн. Хас биирдии киһи үлэлээх буолуутун, кини бырааба көмүскэллээх буоларын ирдиир.
Саха дьоно Пиэрибэй Маайы өрүү кэтэһэр, саамай көхтөөхтүк көрсөр күнэ буолар. Дьокуускайга 150 тыһыынчаҕа тиийэ киһи параакка кыттар.
Бүгүн биһиги дойдубутугар бэриниилээх буоларбытын туоһулуубут. Аан дойдуга буола турар түгэҥҥэ улуу Арассыыйабытын өйүөххэ, киэн туттуохха! Сахабыт сирин дьоно бэйэ-бэйэни өйөһөн-өйдөһөн олоруохха. Бииргэ эрэ буоллахпытына, элбэҕи ситиһиэхпит, кыайыахпыт, сайдыахпыт.
Дьокуускай куорат хомуньуустарын аатыттан бар дьоммун эҕэрдэлиибин! Дьоллоох, доруобай, ситиһиилээх буолуҥ!
Улуу убайбыт тыллара илэ чахчы
иһиллэн кэлэллэр
Руслан Анисимов, ХИФУ Олоҥхо научнай-чинчийэр институтун дириэктэрин эбээһинэһин толорооччу:
— Айар тутар, сайдар, иннин диэки дьулуһар, үрдүккэ дабайар Сахабыт сирин олохтоохторо! Бүгүҥҥү үөрүүлээх Эйэ, Саас, Үлэ, Сомоҕолоһуу бырааһынньыгынан М.К.Аммосов аатынан Хотугулуу-Илиҥҥи федеральнай университет Олоҥхо научнай-чинчийэр институтун кэлэктиибин аатыттан итиитик-истиҥник эҕэрдэлиибин!
Саха сирин дойду оҥостон олорор үгүс ахсааннаах норуоттар Аан ийэ дойду араҕас далбарыгар айыллан үөскээбит айыы дьонун, урааҥхай төрдө буолан ууһаабыт, киһи төрдө буолан кэскиллэммит саха норуотун кытта доҕордоһон, сомоҕолоһон, түмсүүлээхтик, сарын-сарынтан өйөһөн, үтүө суобастаахтык, үлэлээн-хамсаан, бүгүҥҥү күҥҥэ өрөспүүбүлүкэбит, дойдубут сайдар, чэчириир.
Улуу Арассыыйаны кытта быстыспат ситимнээх Саха сирин кэнчээри ыччата кэлэр кэм туһунан ырааһы, сырдыгы түстүүр уонна хорсуннук, дьулуурдаахтык үөрэнэр, сайдар, үлэлиир. Күүстээх санаалаах, бэйэтин күүһүгэр эрэнэр уонна туруоруммут сыалын-соругун ситиһэр ыччаттаах буоламмыт өрөспүүбүлүкэбит инникитэ дьэҥкэ, сырдык, самныбат саргылаах буоларыгар саарбаҕалаабаппыт.
Маннык күҥҥэ Улуу убайбыт Былатыан Ойуунускай хоһуйан кэбиспит ийэ дойдуга таптал, кининэн киэн туттуу туһунан тыллара илэ чахчы иһиллэн кэлэллэр.
Мин кэрэ дойдукам – улуу дьол уйата
Мин туйгун норуотум – айар күүс кыһата.
Мин сирим дьиктикээн көмүс күөх буоругар
Күн уотун күлүмэ күрүлүү саккырыыр,
Мин күндү сибэкким уран уус ньууругар
Күн уота күлбэхтээн мичиҥнээн ылбахтыыр
Кыайыыны эр сүрэх туойара,
Кыыс оҕо сүрэҕин туотара-
Манна күн үҥкүүлүүр,
Манна дьол күлүмнүүр!
Волонтердар ааттарыттан эҕэрдэ!
Айтал Керемясов, СӨ Дьокуускай куорат гражданнар уонна тэрилтэлэр туруорсууларын уонна иһитиннэриилэрин кытта үлэ салаа салайааччыта, Чурапчы улууһун “Кыайыы волонтердара” хамсааһын салайааччыта, СӨ Ыччат парламенын тыа хаһаайыстыбатыгар, аграрнай бэлиитикэҕэ уонна бэйэни салайыныыга кэмитиэт салайааччыта, СӨ ыччат бэлиитикэтин туйгуна
— Чурапчы улууһун кыайыы волонтердарын аатыттан Үлэ, Эйэ, Саас бырааһынньыгынан өрөспүүбүлүкэ олохтоохторун ис сүрэхпиттэн эҕэрдэлиибин! Бары биир сомоҕо буолан үлэлиэҕиҥ-хамсыаҕыҥ, айыаҕыҥ-тутуоҕуҥ! Айылҕа чэчириирин кытта тэҥҥэ чэмэлийэн, чэлгийэн иһиэҕиҥ. Сандал сааһы кытта саныыр санаабыт сатанан истин. Эдэрдии эрчимнээх санааны баҕарабын. Биһиги, ыччат дьон, үлэни, эйэни өрө тутан, төрөөбүт өрөспүүбүлүкэбит сайдыытыгар хас биирдиибит сэмэй кылааппытын киллэрэргэ, дойдубут сайдарыгар кыахпыт баарынан кыһаныахтаахпыт. Күргүөмнээх үлэни тэрийиигэ дьулуһуохтаахпыт. Ыччаты үөрэххэ, үлэҕэ көҕүлүөхтээхпит. Туругурдун — Үлэ, Эйэ, Саас!