Киин куоракка олорор биир дойдулаахтар түмсүүлэрэ (землячество) өр сыллартан үлэлээн-хамсаан кэлбит уопсастыбаннай хамсааһын быһыытынан биллэр. Өрөспүүбүлүкэҕэ олохтоох салайыныы тиһигэр киириигэ маннык түмсүүлэр бэйэ ис кыаҕын туһаныы биир ырычааҕын быһыытынан сыаналананан, бу хайысханан ыытыллар үлэ биллэрдик күүһүрдүллүбүтэ.
edersaas.ru
Соторутааҕыта Дьокуускайга, «Сахамедиа» холбоһук пресс-киинигэр, Хаҥалас улууһуттан төрүттээхтэр түмсүүлэрин бэрэссэдээтэлэ Афанасий Ноев салалтатынан бары улуустартан биир дойдулаахтар түмсүүлэрин салайааччыларын уонна бэрэстэбиитэллэрин мунньаҕа буолан ааста. Мунньахха балаҕан ыйын 9 күнүгэр ыытыллар Ил Дархан быыбарыгар кыттыы туһунан боппуруос көрүлүннэ.
Матвей Евсеев, Сунтаартан төрүттээх биир дойдулаахтар түмсүүлэрин бэрэстэбиитэлэ:
– Саха өрөспүүбүлүкэтин, саха норуотун дьылҕатын быһаарар быыбарга биһиги улууһунан арахсыбакка, омугунан хайдыспакка сомоҕолоһуох уонна Ил Дарханынан Айсен Николаевы талыах тустаахпыт. Билигин, олох балысханнык сайдар, аныгы технология киллэриллэр кэмигэр, кини – саамай сөптөөх кандидатура. Дойду үрдүкү салалта Айсен Сергеевиһи өйөөтө, аны норуота уолбутун өйүүрбүтүн биллэриэҕиҥ!
Галина Иванова, Орто Халыма улууһуттан төрүттээхтэр түмсүүлэрин бэрэссэдээтэлэ:
— Айсен Николаев улуустарга бастакы сырыытын Орто Халыматтан саҕалаан, халаан ыарахан кэмигэр биһиги биир дойдулаахтарбыт санааларын бөҕөргөттө, өрөспүүбүлүкэ кинилэри өйүүрүн, көмөлөһөрүн көрдөрдө. Орто халымалар Айсен Сергеевиһи – өрөспүүбүлүкэ лидерин быһыытынан билинэбит.
Бу курдук элбэх киһи, ол иһигэр Владимир Птицын (Мэҥэ Хаҥалас түмсүүтэ), Иван Полушкин (Абый түмсүүтэ), Анастасия Павлова (Бүлүү түмсүүтэ) уо.д.а. санааларын үллэһиннилэр. Айсен Николаев Ил Дархаҥҥа саамай сөптөөх хандьыдаат буоларын, бу улахан үлэҕэ толору бэлэмнээҕин эттилэр. Түмүккэ, мунньах кыттыылаахтара Ил Дархан быыбарыгар көхтөөхтүк кыттарга быһаарыннылар итиэннэ өрөспүүбүлүкэ олохтоохторун Айсен Николаев тула түмсэргэ ыҥырыы таһаардылар.
Раиса СИБИРЯКОВА, «Саха сирэ» edersaas.ru сайт