Интэриэһинэй Уопсастыба

Биир дойдулаахтар пуорумнара тэрээһиннээхтик ыытылынна

Ааспыт нэдиэлэҕэ Саха сиригэр араас омук сириттэн уонна дойду эрэгийиэннэриттэн үгүс ыалдьыт кыттыылаах өтөрүнэн буолбатах олус элбэх тэрээһин буолан ааста. Онтон биирдэстэрэ — омук сиригэр уонна Арассыыйа эрэгийиэннэригэр олорор биир дойдулаахтар I пуорумнара.

Дьокуускайга ыытыллыбыт бастакы тэрээһин туһунан СӨ Тас сибээскэ уонна норуоттар дьыалаларын министиэристибэтин отделын салайааччыта Айталина Никифорова маннык кэпсиир:

Бу бырайыагы 2019 сыллаахха Саха сиригэр биллэриллибит Сомоҕолоһуу сылыгар норуот дипломатиятын актыбыыстара көҕүлээбиттэрэ. Манна омук дойдуларыгар олорор Саха  сиригэр сыһыаннаах дьон эрэ буолбакка, Арассыыйа бары эрэгийиэннэригэр олорор сахалары барыларын кытыннарабыт.

Биир дойдулаахтар I пуорумнарыгар 17 тас дойдуттан Арассыыйа 8 эрэгийиэниттэн 50-тан тахса киһи кэлэн кыттыыны ылла. Идиэйэтэ 2019 сыллаахха үөскээн баран, аан дойду үрдүнэн сыстыганннах дьаҥ бүрүүкээн, үлэбит икки сыл тохтуу сылдьыбыта. Онтон быйыл Саха АССР төрүттэммитэ 100 сылыгар биир дойдулаахтар түмсүүлэрэ, омук сирдэригэр баар саха диаспоралара анаан түмсэн, пуорум ыытан, Сүрүннүүр сэбиэт тэринэргэ санаммыттара. Тэрээһиҥҥэ бэлэмнэнии ааспыт сылтан саҕаламмыта. Элбэх киһи кэлиэ дии санаабыппыт да, билиҥҥи балаһыанньаланан сибээстээн, сөмөлүөттэр көппөккө, кэлиэхтээх дьон үксэ кыайан кэлбэтилэр.

Ааспыт сылтан бэлэмнэммиппит. Элбэх киһи кэлиэ дии санаабыппыт да, билиҥҥи балаһыанньанан сибээстээн, сөмөлүөттэр көппөт буолан, сорохтор кыайан кэлбэтилэр.

Бүгүҥҥү күҥҥэ саха диаспоралара Латвияҕа, Киргизияҕа, Канадаҕа, Кытайга, Турцияҕа уопсастыбаннай түмсүү тэринэн үлэлииллэр. Биһиги министиэристибэбит маны таһынан Сербияҕа, АХШ-га, Исландияҕа, Великобританияҕа, Германияҕа олорор биир дойдулаахтарбытын кытта билсэбит.

Уопсастыбаннай тэрилтэлэргэ олус көхтөөх дьонноохпут. Ол курдук, холобура,  Латвияҕа 1993 сылтан ыла Саха сириттэн көһөн барбыт сахалар түмсэн, “Чороон” диэн ассоциация тэринэн үлэлииллэр. Онно Прибалтика дойдуларын сахалара уонна Саха сиригэр олоро сылдьыбыт дьон бииргэ сомоҕолоһон араас хайысхалаах үлэни ыыталлар. Итинник биир дойдулаахтар түмсүүлэрэ Калининградка, Москваҕа, Санкт-Петербурга баар. Тас дойдулартан 2018 сылтан Турцияҕа сахалар ассоциация тэринэн үлэлииллэр. Канадаҕа сахалар диаспоралара баар. Маны таһынан, Европа, Африка континеннарыгар биирдиилээн актыбыыстар биһигини кытта ыкса сибээһи тутуһаллар. Саха сириттэн төрүттээх биир дойдулаахтар I пуорумнарыгар Сүрүннүүр сэбиэти тэрийдилэр. Бэрэссэдээтэлинэн Калининград куоракка олорор Владимир Окоемов талылынна, — диэн  министиэристибэ эппиэттээх үлэһитэ Айталина Никифорова кэпсээтэ.

Ити курдук, Саха сирин тас өттүгэр олорор биир дойдулаахтарбыт – саха дьоно  төрөөбүт дойдуларыгар кэлэн ис куттарын, санааларын, толкуйдарын бөҕөргөтөн бардылар.

 

Елена ПОТОЦКАЯ, «Саха сирэ» хаһыат.

Салгыы видео-устууну көрүҥ. 

Видеоны — ааптар, хаартысканы — Айталина Никифорова тиксэриитэ.

 

0
0
Telegram @edersaas20