Бэс ыйын 23 күнүгэр Дьокуускайга “Арассыыйа – мин историям” мусуойга Биир дойдулаахтар пуорумнара үлэтин саҕалаабыта. Бу аан дойду араас муннуктарыгар олорор, Саха сириттэн төрүттээх дьон бастакы пуорумнара. Онон бу пуорум кинилэргэ да, Саха сиригэр да улахан суолталаах тэрээһин Саха АССР 100 сылыгар ыытыллыбыта ураты суолталаах. Пуорумҥа Ил Дархан Айсен Николаев сырытта.
—Биһиги өрөспүүбүлүкэбит атын эрэгийиэннэри, дойдулары кытары сибээскэ куруук аһаҕас. Бастакы бэрэсидьиэн Михаил Николаев салалтатынан норуоттар икки ардыларынааҕы бииргэ үлэлэһии саҕаламмыта. Холобур, ООН, ЮНЕСКО, Арктикатааҕы Сэбиэт былаһааккаларыгар үлэ барбыта. Аан дойду үрдүнэн норуодунай дипломатия сайдыбыта, уопсастыбаннай уонна айар сибээстэр бөҕөргөөбүттэрэ. Атын эрэгийиэннэргэ уонна дойдуларга олорор дьоммут өрөспүүбүлүкэ олоҕун, сайдыытын кэтээн көрөллөр уонна кыахтара баарынан көмөлөһөллөр, өйүүллэр, — диэн кини эттэ.
Айсен Николаев тас дойдулары, норуоттары кытары сыһыаны бөҕөргөтүүгэ өр сылларга көхтөөхтүк үлэлээбит дьоҥҥо судаарыстыбаннай наҕараадалары туттарда.
Ил Түмэн бэрэссэдээтэлин солбуйааччы Александр Жирков этэринэн, атын дойдуларга олорор биир дойдулаахтарбыт ханна да буоллаллар, Саха сирин туһунан кэпсии, сырдата сылдьаллар, ол омуктарга биһиги өрөспүүбүлүкэбит, норуоппут туһунан өйдөбүлү үөскэтэр. Онон кинилэр Саха сирин бастайааннай бэрэстэбиитэллэрин курдук сылдьаллар. Син биир төрүккүн-уускун билэриҥ, төрөөбүт дойдуну кытары сибээһи тутуһар наада, онуоха бу пуорум сүрүннүүр суолталаах.
— Тас дойдуларга олорор дьоммутугар өрөспүүбүлүкэ көмөлөһүөхтээх, диаспоралар уонна Саха сирин сибээстэрэ сылтан сыл бөҕөргөөн, сайдан иһиэхтээх. Манна бииргэ үлэлэһии саҥа көрүҥнэрин көрдүөхпүтүн, булуохпутун наада, — диэн Михаил Николаев эттэ. Кини өрөспүүбүлүкэ тас дойдулары уонна атын эрэгийиэннэри кытары сибээһи олохтууругар олук уурбут киһи буолар.
Евразия норуоттарын ассамблеятын сэбиэтин бэрэссэдээтэлэ Светлана Смирнова этэринэн, сороҕор дойдулар салайааччылара биир тылы булбатахтарын да иһин, норуоттар култуурунай, дипломатическай сибээстэрэ быстыбат, ол дьон бэйэ-бэйэлэригэр истиҥ сыһыаннарыгар олоҕурар.
Ангелина Васильева, “Саха сирэ” хаһыат, edersaas.ru
Хаартыска: СИА.