Бу күннэргэ Дьокуускайга олорор Сунтаар дьонун түһүлгэтэ киэҥ тэрээһиннээхтик ыытыллан, тэрийээччилэр дьон-сэргэ махталын ыллылар. Бу үгэскэ кубулуйбут улахан дьаһалы сэргэ, Кутана талааннаах ыаллара Федоровтар дойдуларыгар эмиэ ырыа-үҥкүү дьоро киэһэтин бэлэхтээтилэр.
Надежда ЕГОРОВА, «Саха сирэ» хаһыат, edersaas.ru
Кутана олохтооҕо, 7 оҕо ийэтэ, 13 сиэн эбээтэ, «Ырыа дьүөгэ» ансаамбыл салайааччыта Августина Федорова дьиэ кэргэнинээн бүтүн кэнсиэри туруордулар. «Федоровтар дьиэ кэргэттэрэ – талаан биһигэ» диэтэххэ, омун буолбата буолуо. Кэнсиэри Августина Алексеевна кыра уола, өрөспүүбүлүкэҕэ биллэр тамада Михаил иилээн-саҕалаан ыытта. Улахан уола Афанасий кэргэнинээн уонна оҕолорунаан, Мария уонна Айсен Федоровтар, Дария уонна Василий Федоровтар, кыыһа Гульмира Павлова дьоро киэһэни көмүс куоластарынан киэргэтэн, биир дойдулаахтарын биһирэбиллэрин ылыан ыллылар. “Харахпыт далыгар улааппыт оҕолорбут кэнсиэртэрэ сүрэхпитин уулларда, сааскы настарыанньаны аҕалла. Өрөспүүбүлүкэҕэ биллэр, үөрэхтээх, идэлээх ырыаһыттартан туох да итэҕэһэ суохтар, өссө ордуктар», – диэн астыммыттарын биллэрдилэр. Нэһилиэк баһылыга Николай Давыдов Августина Алексеевнаҕа махтал суругу уонна 30 тыһыынча суумалаах сэртипикээти туттарда.
Августина Федорова 7 оҕону соҕотоҕун иитэн, дьоҥҥо-сэргэҕэ үтүө майгылаах, үөрэхтээх, үлэһит дьон оҥортообутун биир дойдулаахтара сөҕөллөр-махтайаллар уонна киэн тутталлар. Кини ийэтэ Варвара Федорова улууска, өрөспүүбүлүкэҕэ сураҕырар, сценаттан түспэт тойуксут этэ. Кини талаана билигин кыргыттарыгар, сиэннэригэр, хос сиэннэригэр бэриллэн, өрөспүүбүлүкэҕэ киэҥник тарҕана туруоҕар эрэл улахан.
Надежда ЕГОРОВА, «Саха сирэ» хаһыат, edersaas.ru