Ааспыт суукка чахчытынан, өрөспүүбүлүкэҕэ 119 ойуур баһаара умайар. Бүгүн сарсыардаттан 38 баһаары умулларыыга 3111 киһи уонна 496 тиэхиньикэ үлэлиир.
Бу туһунан сарсыардааҥҥы брифиҥҥэ СӨ Бырабыыталыстыбатын Бэрэссэдээтэлин солбуйааччы Дмитрий Садовников иһитиннэрдэ.
Бүгүҥҥү күҥҥэ биир да нэһилиэнньэлээх пууҥҥа куттал суоһаабат. 22 ойуур баһаарын умуллардылар. 17 баһаар бохсулунна, эбии 2 саҥа баһаар баара бэлиэтэннэ. Сүрүн болҕомто 4 ойуур баһаара буола турар Уус Маайа улууһугар ууруллар. Ил Дархан сорудаҕынан бу улууска үлэни сүрүнүүр соруктаах экология миниистирин солбуйааччы Яков Заровняев барыаҕа.
Ааспыт сууккаҕа ойуур баһаарын умулларыыга, кэтээн көрүүгэ уонна баһаары умулларааччылары таһыыга 12 көтөр аал үлэлээтэ.
Елена ПОТОЦКАЯ, «Саха сирэ» хаһыат, edersaas.ru
хаартыска — СИА.