Командировка5а сылдьан, «Саха ыала» сыһыарыы суорумньу рубрикатын нөҥүө билсэн, ыал буолбут дьон көрсөн олус үөрдүм, бэйэм кыттыгастаах курдук сананным.
Сааһын тухары Ис дьыала уорганыгар үлэлээбит Константин Слепцов бочуоттаах сынньалаҥҥа тахсарын саҕана аҥардас хаалбыт.
Оҕолоро санаа хоту үөрэхтээх үлэһит буолан, дьылҕаларын батыһан ким куоракка, ким улуус киинигэр олохсуйбуттар. Оттон Константин Константинович, сулууспа киһитэ буоламмын эдэр эрдэхпинэ сөбүн араас улуустарга олорбутум диэн, биһигин ыйаабыт сириттэн, тымныы киинэ аатырар Өймөкөөн сэлиэнньэтиттэн атын сиргэ барыан баҕарбатах. Кырдьар сааһыгар өйөнсөн олорор аргыһы булаары “Саха сирэ” хаһыат “Саха ыала” сыһыарыытыгар тэриллибит Билсиһии кулуубугар суруйбут. Өр өтөр буолбатах, Кэбээйиттэн эмиэ кини курдук дьылҕалаах дьахтартан сурук кэлбит.
Ити курдук, Валентина Абрамовна уонна Константин Константинович 2007 сыллаахха хаһыат көмөтүнэн билсэн холбоспуттар. Бастаан икки сыл Кэбээйигэ олорбуттар, онтон Өймөкөөҥҥө көһөн кэлбиттэр. Саха ыалын сиэринэн сүөһү ииттибиттэр, ону былырыын эрэ эспиттэр. Сааһырбыт дьоҥҥо оттуур-мастыыр уустугуран иһэр буоллаҕа. Валентина Абрамовна саҥа сиргэ талаана арыллыбыт, сылгы сиэлинэн харысхал бэлиэлэри, төбөтөөйкөлөрү, дэйбиирдэри оҥорор буолбут.
— “Саха сирэ” хаһыат биһигини холбообута, дьылҕабытын түстээбитэ. Онон, улаханнык махтанабыт уонна сыллата суруйтаран ааҕабыт, аргыс оҥостобут. Быйылгы сыл иккис аҥарыгар номнуо суруйтаран олоробут, — дэһэллэр кинилэр.
Раиса СИБИРЯКОВА.