«Бигэ олохтоох дьиэ кэргэн»: оҕоҕо доруобуйа туһунан эрдэттэн

Мөлтөхтүк истэр, мөлтөхтүк көрөр оҕолор өрөспүүбүлүкэтээҕи анал (коррекионнай) оскуола-интэринээттэригэр оҕолорго туһалаах тэрээһиннэр тиһиктээхтик ыытыллаллар. Олортон биирдэстэринэн, 12-18 саастаах кыргыттарга акушер-гинеколог Диана Петрова доруобуйаны көрүнүү, чөл-чэгиэн олох туһунан бэсиэдэтин бэлиэтээтилэр. Диана Демьяновна кыргыттарга бэйэ доруобуйатын көрүнүү, чэбдигирдинии, улаатар, саастара ситэр кэмигэр уларыйыылар тустарынан, ону сэргэ, кыыс уонна уол оҕо уратыларын, араас сыстыганнаах ыарыылар тустарынан судургу, өйдөнүмтүө тылларынан быһаарда. Саһарар (гепатит), искэн ыарыыларын, бактериялар, онтон да араас кутталлаах уонна кыайан оҕоломмот буолууга тиэрдэр ыарыылар тустарынан, бэйэни харыстаныы туһунан, о.д.а. элбэҕи кэпсээтэ.

«Кыргыттар, улаатан бараҥҥыт чугас сыһыаннаах доҕордонноххутуна, киниттэн анаалыс туттарарын ирдииргититтэн куттанымаҥ. Бу араас ыарыыттан харыстанаргытыгар туһалаах буолуоҕа. Ыспыраапканы ирдээһин, итэҕэйбэт буолууттан буолбатах. Бу тус бэйэҕитигэр, доруобуйаҕытыгар болҕомтолоох буоларгытын көрдөрөрүн сэргэ, инникитин дьиэ кэргэн тэринэргэ эрдэттэн эппиэтинэстээх сыһыаҥҥытын туоһулуоҕа«, — диэтэ быраас. Кыргыттар быраас кэпсиирин олус сэргээн иһиттилэр. Ыйытыылары да балачча биэрдилэр.

Бырайыак сүрүннээччитэ Алена Атласова маннык сэһэргэһиилэр хас биирдии дьиэ кэргэҥҥэ ыытыллыахтаахтарын бэлиэтиир. Маныаха төһөнөн эрдэттэн саҕалыыгын да, оччонон ордук тиийимтиэ, туһалаах буолуоҕун этэр.

«Тоҕо чуо коррекционнай оскуола-интэринээти таллыбыт диир буоллахха, манна өрөспүүбүлүкэ араас муннугуттан кыргыттар да, уолаттар да мустан үөрэнэллэр. Оттон кинилэр тус бэйэлэригэр туох эрэ ыйытыы үөскээтэҕинэ, эбэтэр ол мунаарар, толкуйга түһэр, билиэн-көрүөн баҕарар кэмнэригэр, аттыларыгар ол кэмҥэ сүбэлиир-амалыыр, өйдөтөр ийэлэрэ, аҕалара, эдьиийдэрэ, убайдара суох буоллахтара. Ол иһин, итинник эрдэттэн өйдөтөр, сүбэлиир үлэни тэрийэ сатыыбыт. Манна даҕатан эттэххэ, бу бастакы сырыыбыт буолбатах. Соторутааҕыта манна уролог-быраас уолаттары кытары көрсөн сэһэргэспитэ, ыйытыыларга хоруйдаабыта», — диэн эттэ уонна маннык аахсыйаны атын да оскуолаларга тиһиктээхтик тэрийэр былааннаахтарын иһитиннэрдэ.

Тэрээһин «Биир ньыгыл Арассыыйа» баартыйа «Бигэ олохтоох дьиэ кэргэн» бырайыагын иитинэн Чэбдигирии сылынан ыытылынна.