Ааспыт нэдиэлэҕэ Уус Алдан улууһун Баатаҕай нэһилиэгэр, туорахтаах култууранан дьарыктанар хаһаайыстыбалар өрөспүүбүлүкэтээҕи көһө сылдьар сүбэ мунньахтара буолан ааста.
edersaas.ru
Бары улуустартан барыта 42 киһи кэлэн кыттыыны ылла. Тыа хаһаайыстыбатын министиэристибэтин Сиртэн үүнүүнү ылыыга уонна материальнай-техническэй хааччыйыыга департаменын салайааччы Василий Чичигинаров сиэмэнэн хааччыйыыны сайыннарар саҥа хос бырагырааманы («Подпрограмма развития семеноводства») билиһиннэрдэ, «Россельхозцентр» ФГБУ Дьокуускайдааҕы салаатын салайааччы Агнесса Данилова өрөспүүбүлүкэ хаһаайыстыбалара ыһар бурдуктарын сиэмэтин хаачыстыбатын туһунан кэпсээтэ.
— Бүгүҥҥү мунньах “Биэттэ-Агро” ХЭУо базатыгар тэриллибитэ мээнэҕэ буолбатах. Бу хаһаайыстыба бурдук сиэмэтин соҕотуопкалааһыҥҥа инники күөҥҥэ сылдьар. Биһигини кинини агротехнологияны кытаанахтык тутуһан үлэлиир, көрдөрүүтүн сыллата тупсарар, оройуоннаммыт бурдук сиэмэтин үүннэриигэ уонна хаһаайыстыбаларга тарҕатыыга саамай уопуттаах хаһаайыстыба быһыытынан билинэбит, сыаналыыбыт. Ол иһин, бурдук ыһыытыгар анаан сиэмэ үүннэриитин торумнуур киэҥ хабааннаах мунньаҕы, чуолаан, Биэттэҕэ тэрийдибит, — диэтэ тыа хаһаайыстыбатын миниистирин солбуйааччы Афанасий Семенов.
Мунньах кыттыылаахтара Баатаҕайга Н.Н.Тарскай аатынан «Сир оҥоруутун мусуойугар» уонна «Биэттэ-Агро» бааһыналарын көрдүлэр-иһиттилэр, бурдук үүнүүтүн үчүгэйинэн сыаналаатылар. Соҕурууттан аҕалыллыбыт туга-ханныга биллибэт сиэмэни ыһарбыт биһиги кылгас сайыммытыгар сиппэт, курааны тулуйбат буолан, үчүгэй үүнүүнү биэрбэт, онон халтайга үлэлиибит. Ол иһин, курааны тулуйумтуо, көрүүгэ-истиигэ талымаһа суох бэйэбит селекционердарбыт таһаарбыт олохтоох сиэмэлэрин ыһар быдан ордук, онуоха бу “Биэттэ-Агро” холобур буолар диэн биир бигэ санааҕа кэллилэр.
Ыспыраапка: «Биэттэ-Агро” ХЭУо 2015 с. сиэмэ хаһаайыстыбаларын ситимигэр киирбитэ. Таһаарыылаахтык үлэлээн тиэхиньикэнэн балачча хааччынна: икки “Т-150”, биэс “МТЗ-82”, биир “ДТ-75” тыраахтардаах, икки булууктаах, үс сиэйэлкэлээх, биэс бараналаах уонна биир “РМГ” ыстарардаах. Икки хонуулаах ыһыынан 669 гектар бааһынаҕа үлэлиир. Саха учуонайдара таһаарбыт “Туймаада” уо.д.а. курдук бурдуктарын сиэмэтин үүннэрэн, элбэтэн, өрөспүүбүлүкэ хаһаайыстыбаларыгар тарҕатар.
Екатерина Захарова, «Саха сирэ» edersaas.ru сайтка анаан.