Биэтэс Билээхэп: Тэпилииссэ туттуох буолбутум да…

Ааптар: 
Бөлөххө киир:

Дьэ, доҕоттоор, быйыл даачабар саас эрдэттэн күһүн хойукка диэри үүнээйини үүннэрэн, ол-бу дьаата-химиката суох, экологическай ыраас, битэмииннээх-иҥэмтиэлээх бэйэоҕуруот аһын кыһыннары хаһаанарга, ордубутун атыылаан-батаран, дьоҕус да буоллар дохуот киллэринэргэ суоттанан оһохтоох, буорун, салгынын сылытар систиэмэлээх хапытаалынай тэпилииссэ туттар былааным тохтон, дэлби кэлэйэн, кыһыйан, санаам алдьанан сылдьабын.

Бу туох аатай ээ-э, дойду бэрэсидьиэниттэн саҕалаан, Бэдэрээссийэ, өрөспүүбүлүкэбит да тойотторо арҕаа дойдулар Арассыыйаны утары атыыга-эргиэҥҥэ, араас экэнэмиичэскэй-бэлитиичэскэй сыһыаннаһыыларга сааҥсыйа дэнэр бобуулары-хаайыылары киллэрэннэр, мантан антах бэйэбит оҥорон таһаарар олохтоох аспытынан-үөлбүтүнэн хааччыныахтаахпыт, олохтоох бородууксуйаны оҥорор тэрилтэлэргэ, урбаанньыттарга онуоха бары өттүнэн өйөбүл, чэпчэтии оҥоһуллуоҕа, кытаатыҥ, үлэлээҥ-хамсааҥ эрэ диэн элэ-была тылларын этэллэр, иэрийбэттэр эрэ.

Ити халҕан аһыллар тас өттүнээҕи дьаһал, аймалҕан. Оттон халҕан сабыллар кэтэх өттүгэр сотору-сотору уларыйар сокуоннарбыт эрэйдииллэр. Сорох-сорохпут ханнык туох уларыйыы баарын үһү-домох курдук истэбит, саатар тэлэбиисэринэн, хаһыатынан кэпсээн-ипсээн испэттэр. Арай ыалларым интэриниэккэ, батсаапка оннук эбии ыстараап киирбит, мантан инньэ аны оннук буолуохтаах диэн куттууллар.

Сураҕа, былырыын дуу, иллэрээ сыл дуу уларыйбыт Гражданнар саадынан, оҕуруотунан дьарыктаныыларын туһунандиэн сокуоннарыгар кэккэ ыстарааптар бааллар үһү.

Холобура, тиэргэҥҥэр кавказтары үтүктэн үтүллүбүт эти таптаан сиир буоллаххына, мангалыҥ дьиэттэн-уоттан 2 миэтэрэ ыраах сиргэ туруохтаах. Тулатыгар умайар от-мас суох буолуохтаах. Манна даҕатан эттэххэ, дачаҥ бөҕүҥ уматаргар буочукаҥ 50 миэтэрэ тэйиччи туруохтаах. Ыстыраап 30 тыһыынча. Бөх-сах, лаҥха баар — 20-50 тыһ. “лас” гына түһүөн сөпДьэ, уоттан харыстаныыга сөбүлэһэбин. Ол эрэн, атына баар ээ

Куурусса ииттиэм этэ диэн эмиэ быстахха былдьаныахха сөп. Ол курдук, сирин-уотуҥ кадастровай сыанатыттан 0.5-1 бырыһыан ыстараап – 10 тыһыынчаттан саҕалаан..

Аны, тиэргэннэригэр, даачаларын учаастагар тэпилииссэ, парник туттар дьон, аһары хапытаалынайдык тутуннахтарына, эмиэ саккай барыахтарын сөп. Оҕуруот сирин кадастровай сыанатын 1%, ол эбэтэр 10000 солкуобайтан итэҕэһэ суох ыстараап!

Оҕуруотун аһын бэйэтэ атыылаатаҕына, сокуоннайа суох урбаанынан ааҕыллар. Барыһыттан нолуок төлөөбөтөх буоллаҕына, киллэриммит дохуотун 40% —ын ыстарааптаан туура тутан ылаллар.

Дьэ, уонна, оҕуруоттанан, тэпилииссэлэнэн абыран. Маҕаһыынтан куурусса сымыытын атыылас, оҕурсуну, помидору эмиэ онтон ылан сиэҥ диэтэхтэрэ.

Халҕан курдук иэччэхтээх олохтоох, кыраны да кынчыаттаһар сокуоннаах буоламмыт, өрүкүйэ-өрүкүйэ оройго сырбатыллан уостан, тохтоон хаалаахтыыр буоллахпыт.

Мин, кырдьаҕас киһи, тэпилииссэ туттар санаам ханнан хаалбытын курдук.

+1
0
+1
0
+1
0
+1
0
+1
0
+1
0
+1
0