Биэтэс Билээхэп: Үтүө санаа, үтүө дьыала тыыннаах холобура

Бөлөххө киир:

Аммаҕа үөрэнээччилэрэ учууталларын дьиэтин көтөхтөрөн, аныгылыы тупсаҕай гына оҥорон, өрөмүөннээн биэрдилэр диэн сонуну сүрдээҕин интэриэһиргии, кэрэхсии аахпытым.

Бу барахсаттарыҥ, инньэ 1991 сыллаахха улуус киинин 2 №-дээх орто оскуолатын «а», «б» кэккэлэһэ кылаастарынан үөрэнэн бүтэрбиттэр. Бэйэлэрэ олохторугар чиҥник үктэммит, үлэ-хамнас, дьыала-куолу, дьиэ-уот, оҕо-уруу бөҕө, саас ортолоох ытык-мааны дьон. 30 сыл анараа өттүгэр оскуоланы бүтэрдэллэр, маладьыастарыҥ бу эйэлээхтэрин, түмсүүлээхтэрин.

Маннык ыраас дууһалаах, сырдык санаалаах, киһиэхэ киһилии сыһыаннаах, кырдьаҕаска ытыктабыл, төрөппүккэ таптал, кыаммакка-тулаайахха өйөбүл-көмө диэн өйдөбүллэри үрдүктүк тутар, ис култууралаах, эрчимнээх, олоҕу хамсатар эрэллээх дьон кыһалҕалаах кэмҥэр аттыгар баар буолуохтара. Үтүө санаа, үтүө дьыала тыыннаах холобурун дьыалаҕа көрдөрүөхтэрэ. Ол да иһин олох салҕанар, ыарахан чэпчиир, сымыйаны кырдьык кыайар, мөкүнү үтүө баһыйар буоллаҕа.

«Киһиэхэ кыра да наада» диибит да, ол «кыраҥ» ис сүрэхтэн тахсар үтүө тыл, сырдык санаанан салайтарыллар көмө-өйөбүл – олоххо саҥалыы эрчимниир улахан, улуу дьыала буоллаҕа. Үйэтин тухары учууталлаан, быйыл бочуоттаах сынньалаҥҥа тахсыбыт Учууталлар учууталлара, РФ үөрэҕириитин туйгуна, Амма нэһилиэгин бочуоттаах олохтооҕо Марианна Ивановна Трифонова бэйэтин дьоллоох учууталынан ааҕыныан ааҕынар.

– Үөрэнээччилэрим бу курдук олус көхтөөхтүк кэлэн көмөлөспүттэрэ ханнык да наҕараадатааҕар үрдүк. Учуутал дьоло – үөрэппит оҕолоругар диэн бу буоллаҕа. Кэргэмминээн, билигин суох Ананий Дмитриевич Трифоновтыын иккиэн салайбыт кылааспыт. Оҕолорум барахсаттар Анатолий Федоров, Аполлон Захаров тутуу улахан маастардара, салайааччылар, тэрийээччилэр буолбуттар. Куоракка олорор Стас Захаров, Иван Максимов тутуу матырыйаалынан хааччыйдылар. Ону барытын Алена Егорова тиэйтэрэн аҕалла. Аллараа Бэстээххэ олорор Татьяна Тастыгина электроматырыйаалынан хааччыйда, Олег Александров электрик буолан, уотум тиһигин саҥаттан тардан, холбоон биэрдэ. Анна Григорьева үөрэнээччим түөрт «Камаз» буор аҕалтарда.

Дьокуускай куораттан оҕолорум Сергей Антипин, Алексей Филиппов, Николай Яковлев, Иван Максимов, Сергей Щабельскай, Покровкаттан Роман Спасьев, Амматтан Семен Атласов, Стас Бессонов, Егор Михайлов, Олег Александров, Яна Григорьева, Сусанна Леонтьева, Вероника Чекальдина, Анна Григорьева, Валентина Батурина, бэл, Бүлүү Кыһыл Сыырыттан Иван Крылов кэлэннэр үлэ бөҕөнү үлэлээтилэр. Санаабын-онообун сайҕаатылар, сэргэхситтилэр. Бээ, биһиги өрөспүүбүлүкэ экэниэмикэҕэ миниистирэ Майя Данилова, Ил Түмэн дьокутаатынан талыллыбыт «Олимпийскай эрэллэр» училище дириэктэрэ Алексей Филиппов курдук кылааһынньыктардаахпыт. Дьон-сэргэ биллиннэр диэн, үөрэнээччилэрим ааттарын киэн тутта ааттаталаатым,— кырдьаҕас учуутал өрөспүүбүлүкэ бэчээтинэн үөрүүтүн, махталын үллэстэр.

Дьэ, үтүө санаа, үтүө дьыала тыыннаах холобура диэн бу буоллаҕа!

+1
0
+1
0
+1
0
+1
0
+1
0
+1
0
+1
0