2000 сыллар саҥаларыгар “Путин, бу туох киһиний?” диэн боппуруос норуоттар икки ардыларынааҕы бэлиитиктэри улаханнык мунаардыбыта. Арҕааҥҥы да, Арассыыйа бэйэбит да сонуннары киэҥник тарҕатар сириэстибэлэрбит Путин ааспыт өттүгэр “КГБ-шнигын” туһунан дьааххана бэлиэтииллэрэ. Кыраныысса таһынааҕы бэчээт кинини тыйыс, сэрэхтээх уонна санаатын биллэрбэт киһи курдук ойуулуура.
Ол эрээри, оччолорго Арассыыйа саҥа баһылыга бэйэтин “ааспыт өттүнээҕитигэр (КГБ)” мэһэйдэппэккэ, норуоттар икки ардыларынааҕы сыһыаннаһыылар эйгэлэригэр “тус бэйэтин дипломатиятын” киэҥник тарҕатан, аан дойду улахан судаарыстыбаларын баһылыктарын кытта чугас, доҕордуу сыһыаны олохтоон барбыта. Арҕааҥҥы лиидэрдэр В.В.Путины дипломатияҕа, тас бэлитиичэскэй эйгэҕэ аһара дайбаммат, байыаннай кыаҕынан куттаабат, ол эрээри, Арассыыйа национальнай интэриэстэрин таарыйар боппуруостарга быһаарыылаах тылын тириэрдэр кыахтаах, аныгы, прагматичнай, инникини билгэлиир, бүтүн аан дойду таһымынан уопсастыбаннай, бэлитиичэскэй быһыыны-майгыны, норуоттар икки ардыларынааҕы сыһыаны уларытыыга дьайар кыахтаах бэлиитигинэн, Арассыыйа судаарыстыбатын модун кыаҕын муҥутуурдук хаҥатар, аан дойду сайдыылаах дойдуларын инники күөннэригэр бигэтик таһаарар күүстээх баһылыгынан билиммиттэрэ, билинэллэр.
XXI үйэ – аан дойдуну атаҕар туруорар дохсун сайдыы муоһатын Азия илиитигэр ылар үйэтэ. Улуу Кытай, Турция, Кэриэйэ, Индия, Арабтар Холбоһуктаах Эмираттара курдук, о.д.а. судаарыстыбалар бэрэсидьиэммит Владимир Путин аатын ааттаан туран, доҕордуу сыһыаннаах бииргэ үлэлииргэ үтүө дьулуһуулара Арассыыйаны модун кыахтаах, эрэллээх судаарыстыба быһыытынан сыаналыылларын туоһутунан буолар.
Бу күннэргэ Аҕа дойдубут Аҕа баһылыга В.В.Путин кэлэр сыл кулун тутарыгар ыытыллыахтаах Арассыыйа Бэрэсидьиэнин быыбарыгар бэйэтин хандьыдатууратын туруорунарга быһаарыммытын “Биир ньыгыл Арассыыйа” бэлитиичэскэй баартыйа XXI сийиэһигэр дэлэгээттэр биир санаанан өйүүргэ быһаарыы ылыммыттарын астына, сэргии көрдүм, иһиттим. Өрөспүүбүлүкэбит Баһылыга, Ил Дархаммыт Айсен Николаев: “Билиҥҥи судургута суох кэмҥэ улахан кыайыыга сирдиир күүстээх лиидэр наада. Владимир Владимирович норуот өйөбүлүн ыларыгар бигэ эрэллээхпин”, – диэн этиитин кытта сүүс бырыһыан сөбүлэһэбин. Аны саас, Арассыыйа Бэрэсидьиэнин быыбарыгар кэлэр көлүөнэ сахалар: оҕолорбут, сиэннэрбит, хос сиэннэрбит эйэлээх, сайдыылаах, дьоллоох олохторун мэктиэһитинэн буолар бэрэсидьиэммит – Владимир Владимирович Путин туһугар, кырдьаҕас киһи тайахха да тэптэрэн кэлэн, икки үйэни ситимнээбит, дойдум туһа диэн айбыт-туппут куоласпын биэриэм. Арассыыйа судаарыстыбатын гражданинын быһыытынан Төрүт Сокуонунан бэриллибит бырааппын, эбээһинэспин, баҕардар тиһэх да төгүлүн, киэн тутта толоруом.