Биэтэс Билээхэп: Сүллүүкүттэр диэбитим…
Олох-дьаһах - Төлкө

Биэтэс Билээхэп: Сүллүүкүттэр диэбитим…

Эмээхсимминиин кымньыы чээйдээн баран, иһим көппөйбүччэ хаадьаҥалас дьыбааммар сынньана таарыйа тиэрэ түһэн “Сахам сирин” ааҕа сытан, бу муҥнааҕыҥ, утуйан хаалбыппын. Арай түүл түһүүбүн быһыылаах.

Тохсунньу томороон тымныыта, сүллүүкүттэр тахсыбыт кэмнэрэ. Дьэ доҕоор, били баҕайылар ыччаттара бадахтаах, ньааҕынаспыт, ньамаласпыт кыргыттар-уолаттар бөҕө туйахтарын тыаһа тоһугураһыы бөҕө буола түстэ. Көрөөрү гынабын да, сирэйбин туох эрэ хачыгырас саба бүрүйбүт. Эмиэ да илиим-атаҕым хамсаабат гына мууска хам тоҥон сытар курдукпун. Били истибэт, дөйүҥү бэйэм, кулгаахтарым чөллөрүйбүттэрэ сүрдээх. Сүллүүкүттэр ыччаттара тугу кэпсэтэллэрин истэ сытабын.

— Шшш!— биһиэнинэн лиидэрдэрэ быһыылаах, аймалҕаны саба шырдьыгынаан, тохтотон кэбистэ. — Чэйиҥ эрэ, болҕойуҥ. Субу аҕай миэдьийэ-холдиҥҥа былааннааһыҥҥа сылдьан кэллим. Ньюс-румҥа мустан күөс быстыҥа кэм мульти-десктээтибит. Бу Орто дойдуга тахса сылдьар кэммитигэр киһилэр олохторун араас өрүттэрин киэҥник уонна суһаллык сырдатар сорук туруорулунна. Генеральнайбыт онлайн контены киэҥник, суһаллык репостааһыҥҥа болҕомтотун туһаайда.

Истэн олорооччулар: “ Ок, ок!” — бөҕөтүн түһэрдилэр, сэҥээрдилэр быһыылаах.

— Хаһыат консолюгар блогердар селфилээһиннээх матырыйааллара хайаан да туруоруллуохтаах диэн буолла. Эрэдээксийэҕэ уопуттаах вайнердары аутсорсиҥҥа ылан үлэлэтэр туһунан быһаарыы ылынныбыт.

Сүллүүкүттэр диэн омуктар кус-хаас тойуктарын сатаан өйдөөмүнэ мунаара сытаммын уһукта биэрдим. Сирэйбин хаһыаппынан бүрүнэн сытар эбиппин. Олоро биэрбитим, быйыл үнүбэрситиэти бүтэрэн, куорат хаһыатын кэрэспэдьиэнинэн үлэлээн эрэр сиэн кыыһым дьүөгэлэриниин тоһугураһан кэлэн, чээйдии, үлэлэрин туһунан кэпсэтэ-сэлэһэ олороллор эбит.

Бэйэлээх бэйэбит оҕолорбут-ыччаппыт саҥаларын-иҥэлэрин биһигинньиктэр тылбаасчыта суох өйдүө суохпут, сүллүүкүттэр саҥаларын курдук истииһибит диэн бэркиһээн, кэлэйэн, сиэммиттэн, кыргыттартан ити тугу саҥардыгыт, кэпсэттигит диэн токкоолостум. Онтум баара: онлайн – билигин буола турар түгэн; консоль – тас өрүт, бастакы сирэй (хаһыат); ньюс-рум – сонун хоһо; репост – сонуну тарҕатыы; селфи – бэйэни хаартыскаҕа түһэринии; мульти-деск – остуол тула олорон мунньахтааһын, үлэлээһин; вайн – 20 сөкүүндэлээх сытыы, күлүүлээх видео-киинэ, ролик; блогер – тус санаатын суруйар киһи; аутсорсинг – дуогабарынан үлэлээһин; контент – ис хоһоон диэн уу сахалыы хайа баҕарар саҥарыахха сөп эбит.

— Оттон уонна тоҕо сахалыы саҥарбаккыт? — оҕолорум сыыстарын мөҕүтэлиэх санаам кииртэлээтэ. Дьэ, уонна, «төрөөбүт төрүт тылбыт, ийэ тылбыт күнэ» дии-дии, бэлиэтээбитэ буолаахтыыбыт…

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

шесть + одиннадцать =