Халлааммыт барахсан дьэ хайдах буолан турда дии санаабаккыт дуо? Мин санаабар, хаарын эрдэ түһэрдэ. Атыттар да оннук санаалаахтар.
Былырыын олох хойукка диэри хаардаабакка, харанан көрөн сыппыта. Былыр эдэр эрдэххэ, эһээм оҕонньор хаар эрдэ түһэрин адьас сүбэлээбэт этэ ээ. Ол эбэтэр, ордук сыспай сиэллээххэ улахан охсууну аҕалар диэччи. Дьэ ол чуолкай. Сири-сибиири барытын хаар үллэччи түстэ диэн буолла. Ити түһэрбитин уулларан, ньылбы сотон ыллаҕына, дьэ өссө куһаҕан буолара буолуо, сүөһүлээхтэргэ. Чэ ол ынах сүөһү туох буолуой, хотон иһигэр бэлэм оту сии-сии кэбинэ-кэбинэ туруохтара буоллаҕа… Дьэ сылгыга олус уустук дьыл буоларыгар тиийэр. Сылгылаах дьон баайдарын үчүгэйдик көрүөхтэри-истиэхтэрин наада курдук.
Бачча сааһыран баран, аны дьон сылгытыгар тоҕо тиийдиҥ диэххит буоллаҕа, эмиэ да оннук курдук. Оччоттон баччаҕа диэри син сылгыларын көрөн кэллэхтэрэ ээ.
Бу күннэргэ таһырдьа тахсан баран, тута түөрт атах буоллум ээ. Дьэ, халтараана диэн сүрдээх. Халтарыйан охтон түөрт атах буола сырыттахпыта, биир эдэр уол көмөлөһөн, өйөөн-убаан туруоран, ааммар диэри илдьэн биэрдэ ээ. Барахсан, эдэр дьон оттотугар билигин да кырдьаҕаска көмөлөһөр үтүө санаалаахтар бааллар эбит диэн үөрдүм аҕай.
Хата, уолум сүбэлээччи буолла ээ. Атах таҥаһыгар кэтэрдиллэр анал тимир тиһилик баарын туһунан бэртээхэй сонуну кэпсээтэ. Ону кэттэххэ, киһи олох халтарыйбатын туһунан эттэ. Мэдиссиинэ малыгар-салыгар, тэрилигэр сыһыаннаах маҕаһыыннарга элбэх үһү диэн кэпсээтэ.
Дьэ мин дьиэбэр киирэн, улахан сиэммэр оннук мал баарын туһунан эттим уонна эбээтигэр уонна миэхэ атыылаһан аҕаларыгар сорудахтаатым. Ээ, киһим ити чааһыгар баҕас олус улгум, начаас икки ардыгар була охсон аҕалан биэрдэ ээ. Дьэ мин эбиэттээн баран, кыратык утуйа түһэн ыллым уонна ол тимирдэрин атаҕым таҥаһыгар иилинэн таһырдьа таҕыстым. Дьэ, бэртээхэй тэрил эбит. Муус да килээйгэ адьас халтарыйбатым. Онон мин курдук саастаах дьон ити тимир тиһиликтэри ыларгыт ордук этэ. Абыраныаххыт турдаҕа. Этэҥҥэ буолуҥ!