Айыкка, ус кыһыны быһа орон, дьыбаан иччитэ буолан, мин да хал буолуохпар диэри сытан-олорон биэрдим. Этим-сииним эмэхсийэн бүттэ. Инньэ гынан, эмээхсиммиттэн мөҥүлүннэрбин да, күн ахсын дьыбар тахсыыта таһырдьаны былдьаһар буоллум.
Чугас буолан, аныгы дьон ааттыылларынан, Аржаанка болуоссакка сыкырыйан кэлэн, улууканнаах Учууталбыт, Былатыан Убайбыт мэҥэ бэлиэтин кэккэлэһэ ыскаамыйаҕа олорон сөрүүн салгыны сүөгэй курдук ыймахтыыбын, түөһүм муҥунан тыынабын. Бүдүгүрбүт, бүөлэммит кулгааҕым-хараҕым сырдыыр, аһыллар, саппаҕырбыт санаам дьайҕарар курдук.
Улуу Убайбыттан саҥа үүммүт күҥҥэ саллайбыт баспар саҥа өй-санаа угарыгар көрдөһөбүн.
Бу өйдөөтөхпүнэ, мин эрэ буолбатах, таһырдьаны былдьаһааччы элбээбит эбит! Оҕо аймах, киһи-сүөһү аалыҥнас буолбут, болуоссат иһэ толору. “Айуу-айа!” дэспитинэн сэргэх түөтэлэр хомурах көҕөттөрүн курдук аттыбынааҕы ыскаамыйаҕа олоро түстүлэр. Тиистэрин-уостарын көрүннүлэр-оҥоһуннулар, мин диэки кураанах ыскаамыйа курдук харахтарын быраҕаллар.
– Дьон уулуссаҕа тахсыбыта биллэр буолбут, бэл, кырдьаҕас оҕонньор-эмээхсин сыылаҥхайдаһан (миигин дьэ таба көрдүлэр), оптуобуска киирэргэ-тахсарга мэһэй-таһай буолаллар, – арыый эдэрчитэ умайыктанар.
– Ээ, абааһы былыргы ПАЗиктар онто суох аһара үрдүктэр. Биһиги курдук кылгас атахтаах дьоҥҥо сөп түбэспэттэр. Былырыыҥҥыттан-иллэрээ сылтан сүүрэн эрэр кэриэйдэр сарай курдук сүүнэ оптуобустара намыһахтар. Киирэргэ-тахсарга олус табыгастаахтар. Бээ, мэрбитигэр Киргиэлэйэпкэ, кини хамаандатыгар абааһы ПАЗиктары буолбакка, кэриэйдэр оптуобустарын хото атыылаһалларын курдук боппуруоһу көтөхтөххө, санааны тириэртэххэ сатаныыһы, – сис да самыы дьахтар, кырдьык да, уот харахха этэн таһаарда ээ… Олох салҕанар, инникитин пассажирдары табыгастаахтык, хаачыстыбалаахтык таһыыга саҥа олох саҥа ирдэбиллэри туруорара диэн ити буоллаҕа.
Бэри диэн бэккиһээн олоробун. Аржаанкаҕа ити куорат дьахталларын амалыйыылара кэлиҥҥи кэмҥэ дьиҥ дьыалаҕа, олоххо киллэриллэрин астына, билэ-көрө сылдьабыт буолбаат. Сыллата уонунан, сүүһүнэн саҥа тупсаҕай оптуобустар атыылаһыллаллар, ичигэс, сылаас оптуобустар тохтобуллара оҥоһуллаллар, суол-иис өрөмүөннэниллэр, тупсарыллар.
Өрөспүүбүлүкэбит салалтата, Дьокуускайбыт дьаһалтата нэһилиэнньэни уопсастыбаннай, муниципальнай тырааныспарынан таһыы-тиэйии, айан-сырыы өҥөлөрүнэн хааччыйыы хаачыстыбатын үрдэтэргэ туһуламмыт кэскиллээх бырагыраамалара утумнаахтык олохтоноллорун ама ким мэлдьэһиэй…