Биэтэс Билээхэп: Онлайн олохтоох аныгы сахалар буоллахпыт…

Бөлөххө киир:

Дьэ, доҕоттоор, бу санаатахха аныгы XXI үйэҕэ олохпут тутулунан, сиэринэн буолан эрэр онлайн өйдөбүлэ түҥ былыргы кэмнэртэн силистээҕэ-мутуктааҕа остуоруйаҕа кэпсэнэрин оҕо сылдьан бэйэбит да билбэппитинэн ааҕан-истэн сөҕөрбүтүн, сиилиирбитин отой умнан кэбиспиппит.

Оҕолорбут, кырачааннарбыт хантан билээхтиэхтэрэй. Билигин кинигэни ким да аахпат, остуоруйалааччы да суох. Саҥардыы хааман туллаҥнаһан эрэр Оккооной, Ньуккуонай чыычаахтардыын, нэһиилэ үнүөхтэһэр эбээлэрдиин-эһээлэрдиин сымарпуоҥҥа, пиэйисбуукка хам сыстан хаалаахтаатыбыт. Хайыахпытый, онлайн олохтоох аныгы кибер-сибилисээссийэ кэмин гумоноидтара буоллахпыт.

Остуоруйаһыт бырааттыы Гриммнэр быһыылаах, аҥала хоруол туһунан суруйбуттарын этэбин. Хайа да хоруол кэтэн, симэнэн көрбөтөх, ханна да суох көстүүмү тигэллэригэр ыйаах таһаарбытыгар, королевствотын үөннээх бортунуойдара араас сирдэртэн-куораттартан киһи хараҕар көстүбэт сиэдэрэй матырыйаалынан, чөмчүүк таас кыбытыылаах, үрүҥ көмүс дуйдаах, кыһыл көмүс солотуулаах көстүүмү онлайн «тигэн» ыыппыттарын чугас чаҕардара-ньээҥкэлэрэ сөҕө-махтайа «кэтэрдибиттэр, таҥыннарбыттар». Киэбириҥсик, аҥала хоруол «дьэ, билигин тахсан придворнайдарбын соһуталыам, кэһэтэлиэм» диэн шпагатын иилинэн, баар-суох малын салыбыратан ийэттэн төрүү сыгынньах үтүөмсүйэ-үтүөмсүйэ хаамыталаабыт. Тыкаарыҥнаспыт мааны баронессалар, графинялар ымсыыран, кыбыстан хоолдьуктара тостуох хоҥкуҥнаспыттар, үөһээ-аллараа тыыммыттар, уора-көстө одууласпыттар. Сорохторо сонно өйдөрүн сүтэрэн сууллан түспүттэр.

Биһиги даҕаны, остуоруйаҕа кэпсэнэр бортунуойдар курдук, дьиэбититтэн быкпакка, тэйиччиттэн үлэлиир, оҕолорбут, ыччаттарбыт оскуолаҕа, үнүбэрситиэккэ, үнүстүтүүккэ, халлыаска, лиссиэйгэ дьиэлэригэр олорон үөрэнэр буоллубут. Тойотторбут кэбиниэттэриттэн тахсыбакка, кириэһилэлэригэр тиэрэ түһэн олорон мунньахтыыллар. Улуу Кыайыы 75 сылынан ылы-чып Өлбөт үйэлээх пуолкаҕа батсаабынан хаамыстыбыт. Куоракка кыбартыырабытыгар куукунанан, сааланан, тыаҕа-даачаҕа тэлгэһэбитигэр хаамсан парааттаатыбыт. Сымарпуоммутунан эҕэрдэлэстибит, көрдөрөн туран үрүүмкэ көтөхтүбүт. Бэрт баҕайы. Туох да улахан түбүк-садьык суох.

Аны Улуу Туймаадабыт онлайн-ыһыаҕа саҕаланна дии! Бэс ыйын 21 чыыһылатыгар диэри уһун-киэҥ ыһыахха араас куонкурустар, лиэксийэлэр, кэнсиэрдэр, туох эрэ хаппыт челенджтэр салҕанан бара тураллар. Кылаабынайа, төлөпүөҥҥүтүн илдьэ сылдьыҥ, сүтэримэҥ. Төлөпүөнүнэн оонньоон аата дуоһуйа-астына оһуокайдыахпыт, уохтаах кымыһы ыймахтыахпыт, сыалаах этинэн эмсэхтэниэхпит, көрү-нары көҕүлүттэн тутуохпут, күөх сайыҥҥа күөххэ күөлэһийиэхпит. Били, остуоруйаҕа кэпсэнэр ийэттэн төрүү сыгынньах аҥала хоруол курдук. Онлайн олохтоох аныгы сахалар буоллахпыт…

Биэтэс Билээхэп, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0