Биэс сыл иһигэр саахалланар туруктаах дьиэттэн 60 тыһыынча киһи көһүөҕэ
Кэлэр биэс сыл иһигэр Саха сиригэр саахалланар туруктаах дьиэттэн көһүү бырагырааматынан 60 тыһыынча киһи саҥа кыбартыыраланыаҕа. Өрөспүүбүлүкэ былаастара 1 мөлүйүөн 100 тыһыынча кв.м. олорор сири көтүрэр былааннаахтар. Бу туһунан Ил Дархан Айсен Николаев Анал этиитигэр иһитиннэрдэ.
Айсен Николаев бэлиэтииринэн, бу үлэ «Олорор дьиэ уонна куорат эйгэтэ» национальнай бырайыак чэрчитинэн ыытыллар. Онон, кэлэр биэс сыл иһигэр бары улуустарга холбоон 1 мөлүйүөн 100 тыһыынча кв.м. саахалланар туруктаах дьиэ көтүрүллэн, 60 тыһыынча киһи саҥа дьиэлэниэҕэ.
«Уустук сорук турар. Ол эрээри улахан үп көрүллэн, былааннаммыт сорук болдьоҕор олоххо киириэхтээх, дьон олорор дьиэлэниэхтээх», — диэн Ил Дархан эттэ.
Айсен Сергеевич үлэһит тиийбэтин да үрдүнэн үлэ ыытылларын бэлиэтээн эттэ. Быйыл өрөспүүбүлүкэ оройуоннарыгар 43 элбэх кыбартыыралаах дьиэ тутуллан, 5,5 тыһыынча киһи дьиэлэммит. Ол курдук, бу бырагырааманан үгүс дьиэ Чурапчыга, Дьокуускайга, Алдаҥҥа, Өлүөхүмэҕэ тутуллубут. Оттон Жатай бөһүөлэгэ Арассыыйаҕа биир даҕаны хаарбах дьиэтэ суох бөһүөлэк буолла.
edersaas.ru
Хаартыска — СИА.