Киин куоракка субуотаҕа, балаҕан ыйын 22 күнүгэр, Автодорожнай уулуссаҕа хас да массыына харсыһыылаах суол быһылаана тахсыбыта. Онуоха ким буруйунан итинник тахсыбыта бүгүн билиннэ.
Ол курдук, СӨ ИДьМ-тын ГИБДД пропагандаҕа отдела иһитиннэрбитинэн, ити күн Автодорожнай уулусса 13 №-дээх дьиэтин таһыгар «Toyota Vista Ardeo» массыына 29 саастаах суоппара массыыналар туруохтаах икки ардыларын тутуспакка, «Toyota Premio» массыынаҕа баран түспүт. Онтон «Премио» иннигэр турар » Toyota Corolla» массыынаны саайбыт, онтон «Королла» «Toyota Platz» массыынаны, онтон «Платц» «Ford Maverick» массыынаҕа тиийэн саайыллыбыт.
Ол түмүгэр, «Тойота Премио» суоппара уоһун быһа түспүт.
Оттон итиннэ барытыгар буруйдаах — уруулга итирик олорбут суоппар! Медицинскэй туоһулааһын көрдөрбүтүнэн, кини 1, 23 мг/л арыгы испит. Эрэйдээх суоппар бэйэтэ да ону билиммит.
Маны таһынан, бу суоппар бэс ыйыгар эмиэ массыынатын итирик ыыта сылдьан тутуллан, бырааба быһыллыбыт эбит.
Тугу оҥорбутун өйдөөбөт, көннөрүнэр санаата суох суоппар бу сырыыга административнай буолбакка, холуобунай эппиэккэ тардыллыаҕа.
Госавтоинспекция Дьокуускай куоракка дьуһуурунай чааһын нүөмэрдэрин санатар: 127, 47-35-69, 02. Уруулга арыгы иһэн баран олорбут киһини биллэххитинэ, ити нүөмэрдэргэ эрийэн биллэриҥ, итинэн киһи эчэйиилээх, өлүүлээх суол быһылааннарын бохсорго көмөлөһүҥ!
Хаартыска: интэриниэттэн