«Сахамедиа» холдинг тэрийэр «Саха сирин киэн туттуута – 2019» норуот бириэмийэтигэр «Урбаанньыт» түһүмэххэ Светлана Семенова биэс бастыҥ урбаанньыттар ахсааннарыгар киирбитэ.
Кини 1988 сыллаахха Дьокуускайга төрөөбүтэ. Кэргэнэ Дмитрий Георгиевиһы кытта былырыын «Сахатехконсалт» тэрилтэни тэрийбиттэрэ. Үөрэх өҥөтүн оҥорорго лицензия ылан, өрөспүүбүлүкэ үрдүнэн аутсорсинг быһыытынан, дьон үлэлиир көмпүүтэрин таҥан биэрэллэр, 44, 223 №-дээх федеральнай сокуонунан судаарыстыбаннай тэрилтэлэр араас табаары атыылаһалларыгар, өҥөнөн туһаналларыгар көмөлөһөллөр, аттестацияҕа бэлэмнииллэр, үлэ харыстабылыгар бары ирдэбили тутуһарга үөрэтэллэр. Ону таһынан, үлэ усулуобуйатын тургутан көрөллөр, наадалаах докумуону, бырайыагы толорон биэрэллэр, үлэһиттэр доруобуйаларын туругун көрүүнү тэрийэллэр.
Семеновтар икки кыыстаахтар, эдэр ыал урбаан үлэтин иккиэн бииргэ саҕалаабыт, бастакы ыарахаттары этэҥҥэ туораабыт буоланнар, бэйэ-бэйэлэрин араас түгэҥҥэ өйдөһө-өйөһө сылдьаллар. «Кэргэним баахта ньыматынан «Анаабыр алмаастарыгар» үлэлээбитэ, ол сылдьан дьон туохха наадыйарын кэтээн, үөрэтэн көрөн баран, урбаанынан дьарыктаммыппыт. Өрөспүүбүлүкэ үгүс улуустарын кэрийдибит, бастаан сууккаҕа 20 чаас үлэлиир этибит. «Биисинэс-инкубатор» резиденнэрэ буоламмыт, кэккэ чэпчэтиинэн туһанабыт. Билигин үлэһит ахсаанын кэҥэтэн, атыы-эргиэн салаатыгар менеджергэ наадыйабыт. Хамнаһа 80-100 000 солкуобайга тиийиэн сөп», — диэн кэпсиир тэрилтэ салайааччыта Светлана Ивановна.
Марианна Тыртыкова, «Саха сирэ», edersaas.ru