Тыа хаһаайыстыбатын Бүтүн Арассыыйатааҕы биэрэпиһигэр бэлэмнэнии быһыытынан, тыа хаһаайыстыбатын дьоҕус биэрэпиһэ атырдьах ыйын 1 күнүттэн саҕаланна.
Кырдьыга, сорох биэрэписчиттэр биир-икки күнүнэн эрдэлээн, суруллар дьону эрдэттэн «көҕүрэтэ» таарыйа, биэрэпиһи ыытыыларын саҕалаабыттара биллэр. Биэрэписчитинэн анаммыт биллэр уопсастыбанньык Ариадна Филиппова биэрэпистээһинин Майа биир уһугуттан ‒ Илин Сэппэнтэн саҕалаата. Манна уонча ыал сайылыыр. Сатыы биэрэписчит куйааһы аахсыбакка, «Маамыкаан» түөлбэни барытын кэрийэн, ким төһө иэҥҥэ туох үүнээйини үүннэрэрин, туох тутуулардааҕын, тутууларын иэннэрин сурунна, эбии чуолкайдаһан ыйыталаһарга диэн төлөпүөннэрин ылла.
Дьон биэрэписчит ыйытыыларыгар балачча улгумнук хоруйдууллар. Илин Сэппэҥҥэ дьиэлэр нүөмэрдэрэ бэриллэ илик буоланнар, нүөмэрдэр дьиэлээхтэр тылларыттан сурулуннулар. Бу эҥээр сүөһү иитээччи диэн суох, Пивоваровтар бааһынай хаһаайыстыбаларын аахсыбатахха. Тэрээһиннээх уонна бааһынай хаһаайыстыбалар, бэйэлэрэ «отчуоттуур» буоланнар, биэрэписчит кинилэргэ тиийбэтэ. Эргэ дьиэ элбэх, саҥа да дьиэлэр баалларыгар эдэрдэр олорордуу оҥостон олороллор. Үксүлэрэ сайылыы кэлэллэр. Улахан күөллээх буоланнар, ууларын носуоһунан бырахтараллар, гаас ситимэ да баар.
Майаттан edersaas.ru саайтка анаан Аркадий Иннокентьев.