Бүтүн Арассыыйатааҕы тыа хаһаайыстыбатын дьоҕус биэрэпиһэ өрөспүүбүлүкэ бары улуустарыгар ыытылынна.
edersaas.ru
Бу биэрэпискэ сүөһүнү-сылгыны, табаны, сибиинньэни, көтөрү иитиигэ, сиртэн үүнээйини ылыыга идэтийэр АПК тэрилтэлэрэ, бааһынай хаһаайыстыбалар, биирдэм урбаанньыттар, көмөлтө хаһаайыстыбалар, даача, саад-оҕуруот холбоһуктара бары хабылыннылар. Оттон кэтэх ыаллар хаһаайыстыбалара талан ылыы бэрээдэгинэн ыраах сытар, мөлтөх суоллаах-иистээх улуустартан ураты, 16 улууска (Аммаҕа, Бүлүүгэ, Горнайга, Ленскэйгэ, Мииринэйгэ, Мэҥэ Хаҥаласка, Намҥа, Ньурбаҕа, Өлүөхүмэҕэ, Сунтаарга, Тааттаҕа, Хаҥаласка, Уус Алдаҥҥа, Уус Маайаҕа, Үөһээ Бүлүүгэ, Чурапчыга) уонна Дьокуускай таһынааҕы бөһүөлэктэргэ биэрэпистэннилэр. Онон, өрөспүүбүлүкэ үрдүнэн быһа барыллаан, 628 тыа хаһаайыстыбатын тэрилтэтэ, 3 222 бааһынай хаһаайыстыба, биирдэм урбаанньыт, 61 345 кэтэх хаһаайыстыба, 314 кэммиэрчэскэйэ суох холбоһук сурукка киирдилэр. Билигин сыыппаралар түмүллэ, чопчулана, бэрээдэктэнэ сылдьаллар. Бүтэһиктээх түмүк кэлэр сылга таһаарыллыаҕа.
Раиса Сибирякова, «Саха сирэ» хаһыат, edersaas.ru