![](https://edersaas.ru/wp-content/uploads/2016/11/pensionery1.jpg)
Эдьигээн уонна Абый улуустарыгар Биэнсийэ фондатын отделын үлэһиттэрэ биэнсийэлээхтэри көмпүүтэргэ үөрэттилэр.
Сааһырбыт дьон саҥа билиини ыларга, үөрэнэргэ олус көхтөөхтөр. Эдьигээҥҥэ барыта 14 киһи көмпүүтэри, Интэриниэти туһанарга үөрэннэ. Ордук судаарыстыбаннай өҥөлөрү оҥорор сайты баһылаабыттарыттан астыннылар. Саамай саастаахтара – 74-тээх эмээхсин “үөрэнэр хаһан да хойут буолбат” диэн бэргэн этиини бигэргэттэ.
Биэнсийэ фондатын үлэһиттэрэ инбэлииттэр интэринээт-дьиэлэригэр кытта тиийэн үөрэттилэр.
Абый улууһугар дьарык киин бибилэтиэкэ саалатыгар ыытылынна. Биэнсийэ фондатын улуустааҕы отделын начаалынньыга Мария Рожина көмпүүтэр ис-тас тутулун билиһиннэрдэ, бэчээттии үөрэнэргэ илии гимнастикатын оҥортордо. Интэриниэккэ хайдах киирэри, электроннай почтаны арыйары үөрэттэ. Таарыйа Биэнсийэ фондатын үлэтин туһунансырдатта. Хас биирдиилэригэр электроннай почтаны арыйан биэрдэ.
Белай Гора сэлиэнньэтигэр маннык дьарыктары сэтинньи ый хас оптуорунньугун аайы ыытарга былаанныыллар.
Ангелина ВАСИЛЬЕВА.