Дьокуускайга биэнсийэлээхтэргэ көмпүүтэргэ элбэх көрүҥнээх күрэхтэһии (многоборье) ыытылынна. Бу — Бүтүн Арассыыйатааҕы IX чөмпүйэнээт эрэгийиэннээҕи түһүмэҕэ.
Чөмпүйэнээти Үһүс саас оскуолата, Нэһилиэнньэни социальнай хааччыйар киин тэрийэн ыыталлар. Арассыыйа Биэнсийэлээхтэрин сойууһа уонна Биэнсийэҕэ пуондатын Саха сиринээҕи управлениета, СӨ Үлэҕэ, социальнай сайдыыга министиэристибэтэ өйүүллэр.
Манна 60-тан аҕа саастаах эр дьон, 55-тэн аҕа дьахталлар кытталлар. Бастаабыт 2 киһи (дьахтар уонна эр киһи) Саха сирин хамаандатыгар киирэн, салгыы Арассыыйаҕа күрэхтэһэ барыахтаахтар.
Чөмпүйэнээккэ биэнсийэлээхтэр көмпүүтэри төһө баһылаабыттарын көрдөрөллөр. Холобур, дьиэтээҕи үлэҕэ А. Пушкин төрөөбүтэ 220 сылыгар анаммыт презентацияны оҥорон кэлиэхтээхтэр; Биэнсийэ пуондатын порталыгар, “Яндекс” көрдүүр систиэмэтигэр үлэлииллэр уонна интэриниэккэ куттала суох буолууга сорудахтары толороллор.
Үһүс саас оскуолата чөмпүйэнээт эрэгийиэннээҕи түһүмэҕин бэһис төгүлүн ыытар. Сыл аайы Бүтүн Арассыыйатааҕы чөмпүйэнээккэ баран кытталлар, бириистээх миэстэлэргэ да тиксэллэр.
Дьокуускайтан, Хатастан, Хаҥалас улууһуттан, Капитоновкаттан барыта 12 киһи кытынна. Сыллата кыттааччы ахсаана элбээн, таһымнара үрдээн иһэрэ бэлиэтэнэр.
Кинилэри үлэ миниистирин бастакы солбуйааччы Иван Алексеев, Нэһилиэнньэни социальнай хааччыйыы кэлим киинин дириэктэрэ Наталья Пахомова, Үһүс саас оскуолатын дириэктэрэ Пелагея Прядезникова эҕэрдэлээтилэр.
Түмүккэ, дьиэтээҕи сорудах түһүмэҕэр Октябрина Капитонова (Хатас) кыайда. Биэнсийэ пуондатын порталыгар үлэҕэ Алексей Томскай (Дьокуускай) иннин кимиэхэ да биэрбэтэ. “Яндекс” көрдүүр систиэмэтигэр үлэҕэ Октябрина Капитонова (Хатас) кими да тулуппата. Интиэриниэккэ куттала суох буолууга эмиэ Алексей Томскай кыайда.
Онон, 1-кы миэстэни Октябрина Капитонова, 2-һи — Алексей Томскай, 3-һү – Лена Усова (Дьокуускай) ыллылар. Октябрина Капитонова уонна Алексей Томскай бэс ыйын 4-6 күннэригэр Киров куоракка Бүтүн Арассыыйатааҕы IX чөмпүйэнээккэ өрөспүүбүлүкэ чиэһин көмүскүү барыахтара.
Ангелина Васильева, “Саха сирэ” хаһыат, edersaas.ru