Суолталаах Уопсастыба

Биэнсийэлээхтэр айаннарын толуйуохтара

Уһук Хоту уонна онно тэҥнэһэр сирдэргэ олорор, кырдьар саастарынан, эбэтэр инбэлиитинэн тахсыбыт страховой биэнсийэлээхтэр айаннарын ороскуотун толуйар буоллулар. Манна Саха сирэ эмиэ киирсэр. Премьер-миниистир Михаил Мишустин биэнсийэлээхтэр сынньанар сирдэригэр бэйэлэрин массыыналарынан кэлэр-барар айаннарын ороскуотун төннөрөр туһунан уураах таһаарда.

Ол эбэтэр, холобур, Ньукулаайаптар массыыналарыгар олорон, Дьокуускайтан Владивостокка баран сынньанан кэллэхтэринэ, бэнсииҥҥэ ороскуоттарын судаарыстыба төлүүр. Айанын ороскуотун толуйар туһуттан, биэнсийэлээх сынньанан кэлэн баран, Биэнсийэ пуондатын салаатыгар тиийэн сайабылыанньа суруйар, массыынатын туһунан докумуону уонна бэнсиини атыыласпытын туоһулуур чектэри туттарар. Эбии тимир суол тырааныспарыгар плацкартнай богуоҥҥа билиэт сыанатын туоһулуур ыспыраапканы ирдиэхтэрин сөп.

Манна диэн эттэххэ, Уһук Хоту олорор, үлэлээбэт биэнсийэлээх икки сылга биирдэ сынньанар сиригэр баран кэлэрэ федеральнай бүддьүөттэн төлөнөр. Билиҥҥэ диэри бу чэпчэтии тимир суолунан, өрүс, муора, салгын тырааныспарынан уонна оптуобуһунан айаҥҥа сыһыаннаах этэ. Бу чэпчэтиини биэрии быраабылатыгар эмиэ уларыйыылар киирдилэр. Билигин биэнсийэлээх сынньана барарын туһунан бигэргэтэр докумуоннары эрдэттэн көрдөөбөт буоллулар. Ханна сынньана барар сирин ыйан туран, сайабылыанньа суруйар, тырааныспар тэрилтэлэрин кытары хантараактаах уонна кэлэр-барар бырайыаһын ыларга анал толуоннаах буоллаҕына, чэпчэтии харчытын тута түһэрэллэр.

Урут биэнсийэлээх сынньана бара да илигинэ, профилакторийга, эбэтэр, санаторийга, турбазаҕа путевканы ирдииллэр этэ. Ону тэҥэ, үлэлээбэт биэнсийэлээх омук дойдутугар сынньана айанныыр буоллаҕына, кыраныыссаҕа диэри кэлэр-барар айанын ороскуота төлөнөр буолла. Урут бу маннык кыах үлэлиир биэнсийэлээхтэргэ эрэ баара, тэрилтэтэ төлүүр буоллаҕына. Сайабылыанньаны Биэнсийэ пуондатын саайтыгар баар Тус кэбиниэккэ киирэн, “Социальнай төлөбүрдэр” салааҕа электроннай көрүҥүнэн биэриэххэ сөп. Бу кэнниттэн 5 хонук иһигэр Биэнсийэ пуондатын сулууспатыгар билиэттэрин уонна тус докумуоннарын аҕалыан наада. 2020 сылга Арассыыйа сиригэр-уотугар сынньаммыт 6944 биэнсийэлээххэ уопсайа 137,4 мөлүйүөн солкуобайы төнүннэрбиттэр. Бу сыл 9 ыйыгар номнуо 5694 биэнсийэлээххэ 112 мөлүйүөн солкуобайы төнүннэрбиттэр.

 

 

0
1
Telegram Whatsapp