Кулун тутар 25 күнүттэн Дьокуускай куоракка уонна аттынааҕы бөһүөлэктэргэ 65-тэн үөһээ саастаах дьон дьиэҕэ олоруохтаахтарын туһунан Айсен Николаев ыйааҕа тахсыбыта. Биэнсийэ пуондатын Саха сиринээҕи салаата бу кэмтэн сааһырбыт дьону сырытыннарарын хааччахтаата.
Биэнсийэ пуондата оҥорор өҥөлөрүн www.gosuslugi.ru судаарыстыбаннай портал, эбэтэр пуонда саайтыгар Тус кэбиниэккэ киирэн, туһаныахха сөп. Үлэ күнүгэр сарсыарда 9 чаастан киэһэ 6 чааска диэри 8-800-100-99-74 нүөмэринэн пуонда исписэлиистэриттэн ыйытан, сүбэлэттэриэххитин сөп. Персональнай дааннайдары эрэйэр боппуруостарга Тус кэбиниэккэ киирэн код ылан баран, ону туһанан эппиэт ылаҕын.
Бу сигэнэн http://www.pfrf.ru/branches/sakha/contacts/ киирэн, Биэнсийэ пуондатын улуустардааҕы салааларын төлөпүөннэригэр эрийиэххэ сөп. Оттон бу сигэнэн http://www.pfrf.ru/knopki/online_kons/ киирэн, пуонда саайтыгар онлайн-консультациялары ылыахха сөп.
Дьокуускайга уонна Жатайга 65-рин ааспыт 27 тыһыынча киһи олороро биллэр, кинилэртэн 4,5 тыһыынча киһи – үлэлиир биэнсийэлээхтэр. Сааһырбыт дьоммутугар оҕолоро, сиэннэрэ, аймахтара, ыаллара электроннай портал нөҥүө наадаларын ситиһэллэригэр көмөлөһүөх тустаахпыт.
Ангелина Васильева, “Саха сирэ” хаһыат, edersaas.ru
Хаартыска: СИА