Сүрүн Уопсастыба

Биэнсийэ нэһилиэстибэнэн бэриллэрин Госдуума утарда

“Сиэрдээх Арассыыйа” баартыйа фракцията страховой биэнсийэ нэһилиэстибэнэн бэриллэрин туһунан сокуон барылын бэлэмнээн киллэрбитин, Госдуума утарда.


Дьокутааттар “кырдьар сааһынан ылар страховой биэнсийэни ыларга мэктиэлэммит кэм (гарантированный период)” диэн өйдөбүлү киллэрэн, сокуонунан бигэргэттэрээри гыммыттара. Ол чэрчитинэн, бырабыыталыстыба сыл аайы киһи олоҕун уһунун барыллаан ааҕан, быһаарар, бу сааска өссө биэс сыл эбиллэр. Киһи бу кэмҥэ диэри тиийбэккэ, өлөн хааллаҕына, мунньубут биэнсийэтин нэһилиэнньиктэрэ ылыахтаахтар диэн.

Ол эрээри, Госдуума үлэҕэ, социальнай бэлиитикэҕэ уонна бэтэрээннэр дьыалаларыгар кэмитиэтин дьокутааттара бу өйдөбүл РФ Гражданскай кодексын утарар диэн эттилэр. РФ Конституционнай суутун быһаарыытынан, “биэнсийэни ылар быраап тус гражданин личноһын эрэ кытта сибээстээх” үһү. Онон нэһилиэстибэ быһыытынан бэриллибэт диэн быһаарбыттар.

Биэнсийэ пуондата иһитиннэрбитинэн, билигин киһи өлбүт ыйыгар ылбатах буоллаҕына, оҕолоругар, кэргэнигэр биир ыйдаах биэнсийэтэ бэриллэр.

Кэмитиэт ылыммыт быһаарыыта өлбүт киһи үлэлиир кыаҕа суох иитимньилэрэ иитэр-аһатар киһилэрин сүтэрбиттэринэн страховой биэнсийэни ылар бырааптарын күөмчүлүөн сөп.

Ангелина ВАСИЛЬЕВА, “Саха сирэ” хаһыат, edersaas.ru

 

0
0

Добавить комментарий