Идэлээх сойуустар федерациялара Уһук Хоту уонна онно тэҥнэһэр сирдэргэ биэнсийэҕэ тахсар сааһы уруккутугар төннөрөрү модьуйан, дьон илии баттааһынын сыл саҥатыгар хомуйан саҕалаабыттара. Ый кэриҥэ ааспытын кэнниттэн, 66 466 илии баттааһыны хомуйдулар.
edersaas.ru
2019 сыл тохсунньу 1 күнүттэн Уһук Хоту олорор дьахталлар 55 саастарыгар, эр дьон 60 саастарыгар биэнсийэҕэ тахсар буолбуттара. Урут биэнсийэҕэ тахсар саас 50, 55 тэҥнэһэрэ. Ол эрээри хотугу чэпчэтии (5 сыл эрдэ тахсыы) оннунан хаалбыта, ону тэҥэ Уһук Хоту олорбут, үлэлээбит дьахтар 2 оҕолоох буоллаҕына, 50 сааһыгар биэнсийэҕэ тахсар.
Илии баттааһыннаах илиистэри сканердаан, электроннай көрүҥҥэ көһөрөн баран, Уһук Илиннээҕи идэлээх сойуустар түмсүүлэрин ассоциациятыгар ыытыахтаахтар. Ону тэҥэ Госдуума дьокутааттарыгар, РФ Федерация Сэбиэтин чилиэннэригэр бу көҕүлээһини өйүүллэригэр ыҥырыылаах суруктары ыыталыахтара.
“Биир мөлүйүөҥҥэ тиийбэт нэһилиэнньэлээх эрэгийиэҥҥэ 66 тыһыынча киһи илии баттаабыта – дойду салалтата уонна Госдуума дьокутааттара бу боппуруоһу хаттаан көрөллөрүгэр төһүү буолуоҕа”, — диэн Идэлээх сойуустар федерациялара иһитиннэрэр. Илии баттаабыт дьоҥҥо уопсастыба олоҕор кыһаллалларын иһин, махталларын биллэрэллэр.
Ангелина Васильева, “Саха сирэ” хаһыат, edersaas.ru