2019 сылтан биэнсийэҕэ тахсар саас 5 сылынан уһаата. Биэнсийэҕэ тахсаллара 5-тэн аҕыйах сыл хаалбыт дьон (предпенсионеры) кэккэ чэпчэтиинэн туһанар бырааптаахтар. Ону сиһилии бу инфографикаттан көрүҥ.
edersaas.ru
Ыарахан үлэҕэ сылдьар, анал ыстаастаах дьон 5 сыл эрдэ тахсар бырааптаахтар. Кинилэргэ биэнсийэҕэ тахсыах иннинээҕи кэм 5 сылынан эрдэлээн биэрэр. Холобур, оптуобус суоппардара анал ыстаастаах буоллахтарына (15 сыл дьахталларга, 20 сыл эр дьоҥҥо), дьахталлар 50, эр дьон 55 саастарыгар тахсаллар. Оччотугар биэнсийэҕэ тахсыах иннинээҕи кэм кинилэргэ 45 уонна 50 саастарыттан саҕаланар. Элбэх оҕолоох ийэлэр 50 саастарыгар тахсаллар, оччотугар кинилэргэ биэнсийэҕэ тахсыах иннинээҕи кэм 45-тэн саҕаланар.
Саха сиригэр биэнсийэҕэ тахсыан иннинээҕи саастаах дьон үлэнэн хааччыллалларыгар болҕомто ууруллар. Дьарыктаах буолуу судаарыстыбаннай кэмитиэтин бэрэссэдээтэлэ Степан Москвитин иһитиннэрбитинэн, Үлэ иниспиэксийэтин уонна Биэнсийэ пуондатын Саха сиринээҕи салаатын кытта бу боппуруоска регионнааҕы бырагырааманы оҥорбуттар. Ол чэрчитинэн, идэни уларытыыга, квалификацияны үрдэтиигэ куурустар, психологическай көмө, бэйэлэрэ дьыала арыналларыгар көмөлөһүү, о.д.а. миэрэлэр былааннаммыттар.
Кэмитиэт дааннайдарынан, ааспыт сыл иккис аҥаарыгар биэнсийэ тахсаллара чугаһаабыт эрээри, үлэтэ суох хаалбыт 697 киһи кэлэн көмө көрдөөбүт. Кинилэртэн 243 киһиэхэ үлэ булан биэрбиттэр.
Ангелина Васильева, «Саха сирэ» хаһыат, edersaas.ru