Биэнсийэҕэ эбии төлөбүрү ылааччылар испииһэктэрэ кэҥээтэ

Бөлөххө киир:

2019 сылтан тыа хаһаайыстыбатын үлэһиттэрэ биэнсийэлэригэр эбии төлөбүрү ылар буолбуттара. Бу күннэргэ РФ Үлэҕэ, социальнай көмүскэлгэ министиэристибэтэ эбии төлөбүрү ылааччылар испииһэктэрин кэҥэттэ.

edersaas.ru

Эбии оҥорон таһаарыы уонна тыа хаһаайыстыбатын тиэхиникэтин өрөмүөннүүр, хааччыйар идэлээх дьон, ону тэҥэ, тыа хаһаайыстыбатын эбийиэктэрин харабыллыыр үлэһиттэр киирдилэр.

Испииһэккэ тыа хаһаайыстыбатыгар табаары, бородууктаны оҥорон таһаарар предпринимателлэр эмиэ киирэллэрин туруорсаллар.

Санатар буоллахха, кырдьар сааһынан уонна инбэлиитинэн тахсыбыт страховой биэнсийэлээхтэргэ бигэргэммит төлөбүр 25% үрдээн, 1333 солк. 55 харчыга тэҥнэспитэ. 2019 сыл балаҕан ыйыгар диэри хаттаан ааҕыы (перерасчет) бука барыларыгар оҥоһуллуохтаах.

Саха сирин олохтоохторо бу эбии төлөбүрү ылалларыгар маннык усулуобуйалаах:

  1. Тыа хаһаайыстыбатыгар сорох дуоһунастарга 30 сыл ыстаастаах.
  2. Тыа сиригэр олохсуйан олорор.
  3. Үлэлээбэт.

Биэнсийэ пуондатын Саха сиринээҕи салаата иһитиннэрбитинэн, өрөспүүбүлүкэҕэ бу 3 ирдэбилгэ сөп түбэһэр киһи аҕыйах эбит (3 тыһ. кэриҥэ киһи). Холобур, Ньурба куорат буолан, манна олорор киһи хапсыбакка хаалар.

Ыспыраапка

РФ бырабыыталыстыбатын 2018 сыл сэтинньи 29 күнүнээҕи 1440 №-дээх уурааҕынан, ханнык хайысханан, туох дуоһунаска үлэлээбит дьон ылаллара чопчуламмыта (урукку ааҕыынан):

Үүнээйини, оҕуруот аһын олордуу: агроном, агрохимик, агротехник, бахчевод, биригэдьиир, суоппар, тырахтарыыс, комбайнер, кылаабынай инженер, салайааччы (бэрэссэдээтэл, дириэктэр), сала­йааччыны солбуйааччы, гидроме­лиоратор, кылаабынай механизатор, кылаабынай энергетик, слесардар, оробуочай, управляющай, звеньевой, сэбиэдиссэй, чинчийээччи-селекционер, машинист, үүнээ­йини үүннэрии маастара, тутуу сыаҕын маастара, тиэхиньикэни өрөмүөннүүр үлэһит, оператор, холкуос, сопхуос чилиэнэ, энтомолог, уо.д.а.

Сүөһүнү, хамсыыр-харамайы иитии: биригэдьиир, бэтэринээр, бэтэринээринэй сулууспа бактериолог-бырааһа, биэлсэрэ, санитара, бэтэринээр-техник, суоппар, кы­­лаабынай инженер, сыах начаалынньыга, бааһынай хаһаайыстыба салайааччылара, солбуйааччылара, животновод, ыанньыксыт, сүөһүнү көрөөччү, оператор, техник, технолог, ыҥырыаны иитээччи, тырахтарыыс, машинист, управляющай, бааһынай хаһаайыстыба үлэһитэ, ихтиолог, балыгы үөскэтээччи, балык артыалын үлэһитэ, зоотехник, кылаабынай инженер, механизатор, токарь, слесарь, моторист, электрик, күндү түүлээҕи иитээччи, мелиоратор, уо.д.а.

1992 сылга диэри холкуостарга, сопхуостарга, МТС-тарга, бааһынай хаһаайыстыбаларга үлэлээбит дьон (идэтиттэн, дуоһунаһыттан тутулуга суох).

Бу хайысхаларынан уопсайа 30 сылтан кырата суох кэмҥэ үлэлээбит биэнсийэлээх докумуоннарын 2019 сыл бүтүөр диэри Биэнсийэ пуондатын управлениетыгар аҕаллаҕына, эбии төлөбүр бу сыл тохсунньутуттан ааҕыллар, хаттаан ааҕыы (перерасчет) оҥоһуллар. Кини 2019 сыл ахсынньы 31 күнүттэн хойутаатаҕына, эбии төлөбүрү хаттаан аахпакка, кэлэр ыйтан ылан барар.

Ангелина Васильева, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0