2019 сылтан биэнсийэ систиэмэтигэр элбэх уларыйыылар киириэхтээхтэр. Киһи мунаарара үгүс. Онон ааҕааччыларбытыттан ыйытыылары хомуйдубут.
Ыйытыыларга РФ Биэнсийэ пуондатын Саха сиринээҕи салаатын үлэһиттэрэ — биэнсийэни аныыры, хаттаан ааҕары, төлүүрү тэрийэр отдел начаалынньыга Анастасия Кычкина уонна социальнай төлөбүр отделын начаалынньыгын солбуйааччы Максим Саввин эппиэттииллэр.
Ыйытыы: Мин биэнсийэҕэ тахсарым 6 сыл хаалла. Туох чэпчэтиинэн туһаныахпын сөбүй?
Эппиэт: 2019 сылтан биэнсийэҕэ тахсар саас 5 сылынан уһаата. Биэнсийэҕэ тахсаллара 5-тэн аҕыйах сыл хаалбыт дьон (предпенсионеры) кэккэ чэпчэтиинэн туһанар бырааптаахтар.
Холобур, дьиэ-уот уонна сир нолуогар чэпчэтиилээхтэр. Сыл аайы ыытыллар диспансеризацияҕа, дьарыктаах буолууга эмиэ мэктиэлэр баар буолуохтара. Биэнсийэҕэ тахсара 5 сыл хаалбыт киһини үлэтиттэн ууратар бобуллар, үлэни биэрээччи холуобунай эппиэтинэскэ тардыллыан сөп.
Үлэтэ суох хаалбыт буоллахтарына, үрдүк босуобуйаны ылаллар.
Ыарахан үлэҕэ сылдьар, анал ыстаастаах дьон 5 сыл эрдэ тахсар бырааптаахтар. Кинилэргэ биэнсийэҕэ тахсыы иннинээҕи кэм 5 сылынан эрдэлээн биэрэр. Холобур, оптуобус суоппардара анал ыстаастаах буоллахтарына (15 сыл дьахталларга, 20 сыл эр дьоҥҥо), дьахталлар 50, эр дьон 55 саастарыгар тахсаллар. Оччотугар биэнсийэҕэ тахсыах иннинээҕи кэм кинилэргэ 45 уонна 50 саастарыттан саҕаланар. Элбэх оҕолоох ийэлэр 50 саастарыгар тахсаллар, оччотугар биэнсийэҕэ тахсыах иннинээҕи кэм 45-тэн саҕаланар.
Ангелина Васильева, «Саха сирэ», edersaas.ru