«Сибиир кинигэтэ» регионнар икки ардыларынааҕы быыстапка-дьаарбаҥка кэҥээн, норуоттар икки ардыларынааҕы «Книжная Сибирь» фестиваль быһыытынан быйыл үһүс төгүлүн балаҕан ыйын 15-17 күннэригэр Новосибирскай куоракка ыытылынна.
Бу тэрээһин чэрчитинэн араас кинигэ быыстапкалара, литературнай семинардар, культурнай уонна да атын тэрээһиннэр ыытылыннылар. Быйылгы фестиваль уратытынан, аан маҥнай регионнар икки ардыларынааҕы «Книга года: Сибирь–Евразия – 2017» аһаҕас куонкурус ыытыллыбыта буолла. Бу куонкуруска Саха сирин «Бичик» национальнай кинигэ кыһата дорҕоонноохтук ааттатта.
Тэрийээччилэр бэлиэтииллэринэн, бу куонкурус дойду культурнай уонна научнай уопсастыбаннаһын улахан сэҥээриитин ылла. Куонкуруска Россия уонна Евразия регионнарыттан барыта 30-н тахса кинигэ кыһата кытынна. Новосибирскай, Кемерово, Новокузнецкай, Барнаул, Омскай, Тобольскай, Ишима, Томскай , Норильскай, Магадан, Москва, доҕордуу Казахстантан – Астана уонна Дьокуускай куораттартан кинигэлэр куонкуруска киирдилэр.
Куонкурус кинигэ кыһаларын, кинилэр оҥорор бырайыактарын өйүүр, ааҕыыны, кинигэни уонна библиотекаҕа сылдьыыны көҕүлүүр сыаллаах ыытылынна.
Куонкурус түмүгэр «Бичик» кинигэ кыһата хас да анал аакка кыайыылааҕынан буолла. Ол курдук «Искусство эйгэтигэр бастыҥ кинигэ, хаартыскалаах таһаарыы» анал аакка «Саха театра сылтан сыл» кинигэ лауреат үрдүк аатын, «Великолепие ювелирных украшений Якутии» альбом дипломант; «Оҕо аймахха бастыҥ кинигэ» анал аакка «Животные Якутии» энциклопедия, «Любимые сказки народов России» кинигэ дипломант; «Бастыҥ кыраайы үөрэтэр кинигэ» анал аакка И.А. Худяков «Краткое описание Верхоянского округа», «Ысыах в благословенной долине Туймаада» кинигэлэр дипломант аатын ыллылар.
Уонна интернет–куоластааһын түмүгүнэн 2600 куоластаах «Образование в Амгинском улусе: история и современность» кинигэ кыайыылааҕынан таҕыста. Ону таһынан «Евразия культураларын хардарыта алтыһыыларыгар кылааты киллэрэр уонна сайыннарар бастыҥ таһаарыы» анал аакка «Маадай Хара» – алтаай баатырдыы эпоһа, «Многоликая земля Олонхо» кинигэлэр дипломаннарынан буоллулар.
Бу куонкурс С.А. Ноҕоруодап аатынан «Бичик» кинигэ кыһата Евразия атын куораттара таһаарар кинигэлэриттэн туох да итэҕэһэ суох, сорох өттүгэр өссө чорбойорун итэҕэтиилээхтик уөрдөрдө, инникитин өссө да айымньылаахтык үлэлииргэ кынаттаата.
Сардаана Верховская, «Саха сирэ» хаһыат, edersaas.ru