Бэҕэһээ Кытай норуодунай Өрөспүүбүлүкэтиттэн Хэйлунцзян провинциятын пропагандаҕа уонна агитацияҕа миниистирэ Чжан Сяолянь, кинигэ таһаарар корпорация дириэктэрдэрин сэбиэтин президенэ Ли Цзюцзюнь, вице-президенэ Тянь Цзиго, тылбаасчыт Ян Кай, оҕо литературатын кыһатын дириэктэрэ Чжан Лисинь, электроннай салааны салайар Янь Сюй, Хэйлунзян политехническай институтун норуоттар икки ардыларынааҕы салаатын тылбаасчыта Сюй Ин, Суйхуа куорат «Синьхуа» кинигэ атыытын ситимин генеральнай дириэктэрэ Чжан Чжэньвэй састааптаах дэлэгээссийэ С.А. Новгородов аатынан «Бичик» кинигэ кыһатыгар ыалдьыттаата.
Дэлэгээссийэни Уһук илиҥҥи Федеральнай уокурукка Саха Өрөспүүбүлүкэтин бастайааннай бэрэстэбиитэлэ Георгий Никонов, Саха Өрөспүүбүлүкэтин Сибээс уонна информационнай технологияларга миниистирэ Александр Борисов уонна миниистири солбуйааччы Чокуур Гаврильев арыаллаатылар.
Ыраахтан кэлбит ыалдьыттары «Бичик» кинигэ кыһатын кэлэктиибэ сахалыы сиэринэн арыылаах алаадьынан, кыынньар кымыһынан айах тутан көрүстүлэр. Салгыы балтараа чаас устата ирэ-хоро кэпсэтэн, икки өттүттэн санаа атастаһан, бэрт таһаарыылаах көрсүһүү буолла.
Дьыалабыай көрсүһүү түмүгэр Хэйлунцзян провинциятын кинигэ таһаарар корпорация дириэктэрдэрин сэбиэтин президенэ Ли Цзюцзюнь Саха сирин туһунан билэр-көрөр интэриэстээхтэрин, «Бичик» кинигэ кыһатын таһаарар кинигэлэрин сэргээбиттэрин, биһирээбиттэрин, инникитин уопут атастаһыытыгар үлэлиэххэ сөбүн туһунан эттэ. «Бичик» кинигэ кыһатын дириэктэрэ Август Егоров: «Биһиги эмиэ бииргэ үлэлэһэргэ бэлэммит, Саха сирин сырдатар кинигэлэрдээхпит,» — диэтэ.