Бибилэтиэкэлэр сэргэх тэрээһиннэри ыыттылар

Бөлөххө киир:

Дьокуускай 390 сылын көрсөр бырааһынньыкка Кыайыы болуоссатыгар сарсыардаттан ырыа-тойук уҕараабат, дьон-сэргэ тоҕуоруһар.

“Читай Город” тэрээһин чэрчитинэн, бибилэтиэкэлэр араас аахсыйалары тэрийэн ыыттылар. Түөрт остуол тухары кинигэлэри өрөһөлүү ууран биэрбиттэрин, ким баҕалаах кэлэн, талан ылла. Бу иннинэ кинигэлэри эмиэ дьонтон хомуйбуттар эбит. Классикаттан саҕалаан “чтивоҕа” тиийэ баар. Кэрэхсэбиллээҕэ диэн, сахалыы уонна оҕо литературата бастакынан, былдьаһыгынан барбыт. Кинигэ долбуурга быыллыйа сыппакка, иккис тыыны ылара үчүгэй буоллаҕа.

Белинскэй аатынан кыраайы үөрэтэр бибилэтиэкэ Дьокуускай туһунан кинигэлэр толору быыстапкаларын аҕалан туруорбут. Манна урут тахсыбыт, сэдэх кинигэлэртэн саҕалаан, саҥа кинигэлэр эмиэ бааллар. Барыларын бииргэ тутан көрөр бэртээхэй эбит.

Маны тэҥэ, “Белинка” үгэскэ кубулуйбут “Горячая 10-ка” лотерятын саҥа сурутааччыларыгар ыытта. Сүүйүүлээхтэр сыаналаах кинигэни сүүйэллэр.

“Смарт” бибилэтиэкэ виртуальнай ачыкылары баҕалаахха барытыгар кэтэрдэн көрдөрөр. Оҕолор да, улахан дьон да сүрдээҕин сэргииллэр. Ачыкы иһигэр 360 кыраадыс эргиччи көрдөрөр. Биир бэйэм Байконуртан ракетаны кытта көтүһэн, куйаарга тахса сылдьан, Сир хайдах көстөрүн көрдүм. Виртуальнай ачыкынан остуоруйа дойдутугар да ыалдьыттыахха сөп.

Онон сэргэх тэрээһини ыытан, бибилэтиэкэлэр дьон интэриэһин тартылар, ааҕыыга көҕүлээтилэр.

Ангелина Васильева, “Саха сирэ” хаһыат, edersaas.ru

Хаартыска: ааптар түһэриилэрэ.

+1
0
+1
0
+1
0
+1
0
+1
0
+1
0
+1
0