Уопсастыба

Бибилэтиэкэ түүнэ — «Белиҥкэҕэ»

В.Г. Белинскэй аатынан кыраайы үөрэтэр Дьокуускай куораттааҕы  бибилэтиэкэ Арассыыйаҕа үгэс быһыытынан сыл аайы  ыытыллар «Бибилэтиэкэ түүнэ» ( «Библионочь») диэн аахсыйа чэрчитинэн быйыл «Былыр уонна бүгүн»диэн тэрээһини ыытта.

Манна ааҕааччылары кытта көрсүһүү олус интиэриэһинэй хайысханан ыытылынна. Ол курдук, ким  бэйэтин төрүччүтүн,  ким туоһунан харысхаллары оҥордулар, ким куорат үһүйээннэрин ааптарын, ким  “Былыр уонна бүгүн” киинэ артыыстарын кытта көрүстүлэр.

Ол курдук, уһуйаан иитээччитэ Ньургуйаана Данилова «Туос абылаҥа» куруһуогар туостан баайы-дуолу тардар саха ынаҕын оҥоттордо.

Онно сэттэ саастаах кырачаантан саҕалаан, аҕам саастаах кырдьаҕаска тиийэ умсугуйан туран оҥорон, бэйэлэрин дьиэлэригэр киэргэл быһыытынан илдьэ бардылар.

«Кыптыый тойуга» куруһуокка Татьяна Никифорова-Тайаана кумааҕынан харысхал кырыйтаран, дьоҥҥо дьылҕаларын кистэлэҥин арыйда. Кини кырыйбыт дьон ойууларын көрөн олорон,   ким туохтан, хайдах харыстаныахтааҕын быһааран биэрдэ.

Эдэр суруйааччы, суруналыыс-блогер, “Бибилэтиэкэ түүнэ” тэрээһиҥҥэ өрүү көхтөөхтүк кыттар  Дмитрий Михайлов куорат фольклора жанрдаах “Дьокуускай куорат үһүйээннэрэ” («Легенды города Якутска») кинигэтин биһирэмин оҥордо.

“Былыр-бүгүн” дьон биһирэбилин ылбыт киинэ дьоруойа Олег Беляев-Күндэлэй  уһуллуу кэмигэр буолбут түгэннэри кэпсээн, киинэ ис хоһоонун өссө киэҥник арыйда.

Арктическай институт устудьуона Гаврил Некутов баҕалаах дьону  тута уруһуйдаан,  мэтириэттэрин бэлэхтээн үөртэ.

Арктическай институт бибилиэтиэкэ салаатын устудьуоннара Нам Хатырыгыттан сылдьар Айыына Антонова уонна Амма кыыһа Светлана Борохина Тайаана ыыппыт тэрээһинин сөбүлээбиттэр.

Кинилэр Анисия Федорова  Аан Иис Ийэ  сүктэр кыыс таҥаһын тикпитин көрдөрбүтүн эмиэ бэркэ интэриэһиргээбиттэр.

Бибилэтиэкэ кыраайы үөрэтэр салаатыгар бу күн суруйааччы, суруналыыс Борис Павлов 7 кинигэтин бэлэхтээн,  соһуччу бэлэх оҥорон үөртэ.

Ити курдук, В.Г. Белинскэй аатынан кыраайы үөрэтэр куораттааҕы бибилэтиэкэ үлэһиттэрэ бэрт интэриэһинэй дьону кытта көрүһүннэртээн, идэлээх бырааһынньыктарынан сибээстээн, ааҕааччыларыгар дьоро киэһэни бэлэхтээтилэр.

 

Елена ПОТОЦКАЯ, “Саха сирэ” хаһыат, edersaas.ru

 

 

 

 

0
0
Telegram @edersaas20