Уус Алдаҥҥа улуустааҕы киин бибилэтиэкэҕэ Дьокуускайтан саха народнай суруйааччыта Иван Мигалкин уонна “Офсет” ХЭУо эппиэттээх үлэһиттэрэ ыалдьыттаабыттар. Бу туһунан тустаах бибилэтиэкэ ааҕааччылары кытары үлэлиир отделын сэбиэдиссэйэ Галина Аммосова иһитиннэрдэ.
— Көрсүһүүгэ “Уһуктуу” айар куттаах дьахталлар улуустааҕы түмсүүлэрэ (сал.Г.В.Аммосова), “Мүрү долгуннара” айар дьоҕурдаах эр дьон улуустааҕы түмсүүтэ (сал.И.И.Попов-Уйбаан Бахсылыырап), “Мүрү саһарҕата” хаһыат кэлэктиибэ, биирдиилээн дьон кытыннылар.
Биир дойдулаахпыт Иван Мигалкин СӨ Суруйааччыларын сойууһун үлэтин-хамнаһын, Сойууска быйыл кимнээх чилиэнинэн киирбиттэрин, бу сылга бэчээттэниэхтээх кинигэлэр тустарынан кэпсээтэ. Онтон “Офсет” ХЭУо кэлбит ыалдьыттар үлэлэрин туһунан билиһиннэрэн баран, кинигэ бэчээттэтиэн баҕалаахтары кытары көрүстүлэр, ыйытыыларга хоруйдаатылар. Бу тэрилтэ бэчээттээбит үлэлэринэн быыстапкатын дьон-сэргэ көрөн биһирээтэ, сэргээтэ, — диир Галина Владимировна.
Түмүккэ дьон-сэргэ олус туһалаах көрсүһүү буолбутун бэлиэтээбиттэр. Кэлэр да өттүгэр хардарыта сибээстэһэргэ баҕалаахтарын эппиттэр.
Сардаана БАСНАЕВА, «Саха сирэ» хаһыат, edersaas.ru