Биатлонист Николай Максимов Уһук Илиҥҥэ бастыыр иһин күрэхтэһиигэ кыһыл көмүс мэтээли ылла.
Биатлоҥҥа Уһук Илиҥҥэ бастыыр иһин биирдиилээн сырсыыга хайыһарга Олимпийскай эрэллэри бэлэмниир өрөспүүбүлүкэтээҕи спортивнай оскуола спортсмена Николай Максимов дистанияҕа куоталаһааччыларыгар иннин биэрбэтэ. Эрэллээхтик бастаан кыһыл көмүс мэтээли ылла диэн үөрүүлээх сонуну СИА иһитиннэрдэ.
Биатлоҥҥа Уһук Илиҥҥэ бастыыр иһин күрэхтэһии Петропавловскай-Камчатскайга олунньу 8 күнүгэр саҕаламмыта. Күрэхтэһиигэ федеральнай уокурук алта эрэгийиэниттэн 15-16 саастаах бастыҥ биатлонистар түмсүбүттэр.
15-16 саастаах уолаттарга Саха сирин спортсмена Александр Процук үрүҥ көмүс призерунан буолбут. Прохор Майдола уонна Максим Бочкарёв уон бастыҥ көрдөрүүлээххэ киирсибиттэр.
Биатлоҥҥа өрөспүүбүлүкэ сүүмэрдэммит хамаандатын кыргыттара бэйэлэрин кылааттарын киллэрсэллэр. Биирдиилээн сүүрүүгэ Саха сирин биатлоҥҥа спордун лиидэрэ Регина Петрова үрүҥ көмүс мэтээли ылбыт. Софья Левина, Августина Иванова биэс бастыҥ көрдөрүүлээхтэргэ киирэри ситиспиттэр.
Уһук Илин уокуругар бастыыр иһин күрэхтэһии саастарынан икки категориянан ыытыллар: 2002-2003 уонна 2004-2005 сылларга төрөөбүт кыргыттарга уонна уолаттарга. Бырагыраамаҕа: сырсыы 7,5, 10 уонна 12,5 килэмиэтиргэ, спринт 4, 5, 6 уонна 7,5 килэмиэтиргэ, ону сэргэ булкаас эстэпиэтэҕэ. Былаан быһыытынан күрэхтэһии нэдиэлэ алтыс күнүгэр диэри салҕанар.
+1
+1
+1
+1
+1
+1
+1