Бу күннэргэ Калугаҕа мас тардыһыыга Арассыыйа чөмпүйэнээтэ буолан ааста. Икки күн устата 23 эрэгийиэнтэн дуулаҕа күүстээх, чиччигинэс иҥиирдээх 126 мадьыны Арассыыйа сүүмэрдэммит хамаандатыгар киирэр туһугар күрэхтэстилэр.
Бүтүн Арассыыйатааҕы мас тардыһыыга федерациятын толорооччу дириэктэрэ Иван Сивцев: «Бу чөмпүйэнээккэ Саха сириттэн барыта 47 спортсмен кытынна. Бу ааспыттааҕы күрэхтэһиини кытта тэҥнээтэххэ, быдан элбэх», — диэн быһаарда.
Биһиги дьоммут барыта 38 мэтээли түөстэригэр иилиннилэр (12 кыһыл көмүс, 10 үрүҥ көмүс уонна 16 боруонса). Семен Атаков (75 киилэ), Иннокентий Федоров (90 киилэ) уонна Татьяна Баишева (85 киилэттэн үөһэҕэ) кыайыы бастакы «амтанын» биллилэр. Сергей Константинов (70 киилэ), Дмитрий Саввин (60 киилэ) уонна Сергей Фролкин (125 киилэттэн үөһэ) хаһыс да төгүлүн кыайдылар.
Биллэр-көстөр мас тардыһааччы, аан дойду үс төгүллээх чөмпүйүөнэ Павел Черноградскай үһүс миэстэни ылбыт. Суотабайыгар эрийэн билсибиппитигэр: «Күрэхтэһии этэҥҥэ ааста. Калугалар чөмпүйэнээти үрдүк таһымнаахтык ыытарга кыһалла сатаабыттар. Мин сэрэбиэйбэр табыллыбататым», — диэн санаатын үллэһиннэ.
edersaas.ru