«Хатастааҕы сибиинньэ комплекса» хааччахтаммыт эппиэтинэстээх тэрилтэҕэ (генеральнай дириэктэр Роман Дмитриев) сибиинньэ көрөөччү оператордартан саҕалаан, сырдатыы-сылытыы боппуруоһунан дьарыктанар электриктэргэ, тиэхиньикэ харыыта суох үлэлиирин көрөр слесардарга, тиэйэр-таһар үлэлээх суоппардарга тиийэ ХЭУо 128 үлэһиттээх.
Манна үлэһиттэр идэлээх сойуустарын сүрүн бэтэринээр Вероника Кириллина салайар. Улахан кэлэктиип кэккэтэ халыҥ, “Биһиги күүспүт — түмсүүгэ” девиһинэн ыытар үлэтэ-хамнаһа да оннук.
Идэлээх сойуус көҕүлээһининэн элбэх култуурунай-маассабай, спортивнай дьаһаллар тэриллэллэр. Ол курдук, Билии күнүгэр үлэһиттэр оскуолаҕа үөрэнэр оҕолоругар бэлэх биэриитэ, Кырдьаҕастар күннэригэр бэтэрээннэри чиэстээһин, Саҥа дьылы, Аҕа дойдуну көмүскээччилэр уонна Дьахталлар күннэрин бэлиэтээһин, сайыны көрсө ыһыах ыһыыта үтүө үгэскэ кубулуйдулар.
Кэлэктиибинэй дуогабар быһыытынан, хамнас үлэ көрдөрүүтүттэн тутулуктанар буолан, үлэ түмүгэр интэриэс улахан. Үлэлиир усулуобуйа тэриллэр, үлэһит киһи сырата сиэрдээхтик сыаналанар. Кэнники алта сыл устата 40 киһи «Саха Өрөспүүбүлүкэтин тыатын хаһаайыстыбатын туйгунун» аатын ылбыт, 35 үлэһит Арассыыйа Тыатын хаһаайыстыбатын министиэристибэтин «Махтал суругунан» бэлиэтэннилэр.
Ааспыт 2017 сыл түмүгүнэн, «Хатастааҕы сибиинньэ комплексын» идэлээх сойууһа “Саха Өрөспүүбүлүкэтин идэлээх сойууһун федерациятын С.Н.Маркин аатынан луареата” буолар чиэскэ тиксибитэ. Оттон бастыҥ үлэлээх идэлээх сойуус бэрэссэдээтэлин солбуйааччы Розалия Маслацова өрөспүүбүлүкэ АПК-тын Ыччатын сэбиэтин бэрэссэдээтэлинэн талылынна.
Раиса Сибирякова, «Саха сирэ» хаһыат, edersaas.ru.
