Биһиги бэтэрээннэрбит маастар нуорматын толордулар

Бөлөххө киир:

Тохсунньу 21-23 күннэригэр Приморье кыраайын Арсеньев куоратыгар хайыһары таптааччылар ортолоругар Уһук Илиҥҥи күрэхтэһии буолла.

edersaas.ru

Күрэхтэһииттэн Саха сирин спортсменнара кыайыы көтөллөөх иһэллэр. Кэрэхсэбиллэээҕэ диэн, кинилэр биһиэхэ барыбытыгар үтүө холобуру көрдөрө сылдьар бэтэрээн-спортсменнар.
Хайыһарга күөн күрэстэһии үс күн устата ыытылынна. Бастакы күн хайыһарынан үгэс буолбут хаамыынан, иккис күҥҥэ көҥүл стилинэн, үһүс күн «преследование» көрүҥүнэн күрэхтэстилэр. Тохсунньу 22 күнүгэр ыытыллыбыт иккис күҥҥэ барыта 113 спортсмен хайыһарынан  сүүрдэ.
Саха сириттэн кыттыбыт хамаандата салайааччыта Екатерина Никитина кэпсээбитинэн, Уһук Илиҥҥи күрэхтэһиигэ 30 саастарыттан саҕалаан илин-кэлин түсүһэллэр. Хайыһары таптааччы хас биирдии спортсмен бэйэтин сааһынан бөлөххө күрэстэһэр.
«Биһиги Саха сириттэн алта эрэ киһи буолан кытынныбыт. Тоҕо диэтэххэ, сүрүн хамаандабыт олунньу 9-14 күннэригэр хайыһары таптааччылар (любитель) ортолоругар Бүтүн Арассыыйатааҕы кыһыҥҥы успуорт 2-с оонньууларыгар күрэхтэһэ көтүөхтээх. Арсеньевеҕа ыытыллыбыт күрэхтэһиигэ кыттыбыт алта киһиттэн сааһынан көрөн араас бөлөххө Василиса Семеновна Слепцова, Иван Иванович Слепцов икки төгүл чөмпүйүөннээтилэр. Түмүгэр 5 киһи араас мэтээли ылан, үрдүк чиэскэ тигистэ. Ону таһынан 60-64 саастаахтарга биһиги спортсмеммыт Владимир Данилов «преследование» сүүрүүгэ 41 кыттааччыттан 10-с миэстэҕэ тахсан, үөрүүбүт өссө үрдээтэ», -– диэн Екатерина Семеновна хамаанда ситиһиитин үллэһиннэ.
Ону таһынан бу күрэхтэһиигэ успуорт маастарын нуормата толоруллар (Хайыһары таптааччылар Арассыыйатааҕы сойуустарын). Быйылгы күрэхтэһиигэ Екатерина Семеновна Никитина уонна Иван Иванович Слепцов (75-79 саастаахтар бөлөхтөрүгэр) успуорт маастарын нуорматын аан бастаан толордулар. Бу күрэхтэһиигэ Арассыыйаҕа уонна аан дойдуга Саха сириттэн барыта 8 киһи успуорт маастарын нуорматын толорбута. Екатерина Никитина  күрэхтэһии бастакы күнүгэр «ж9» бөлөххө (70-74 саастаахтарга) үгэс буолбут стилинэн 3 килэмиэтиргэ кыайан,  успуорт маастарын нуорматын толордо. Бу бөлөххө Василиса Слепцова иккис миэстэни, Альбина Корнилова 5-с миэстэни ыллылар.
Онтон күрэхтэһии иккис күнүгэр көҥүл стилинэн 3 килэмиэтиргэ сүүрүүгэ Василиса Слепцова кыайда, Екатерина Никитина 2-с миэстэ буолла. Иван Слепцов «м10» бөлөххө (75-79 саастаахтарга) үгэс буолбут уонна көҥүл стилгэ 5 килэмиэтиргэ сүүрэн, икки төгүл бастаата. Владимир Данилов «м7» (60-64) үгэс буолбут стилинэн 5 килэмиэтиргэ сүүрэн боруонса мэтээли ылла, иккис күнүгэр көҥүл стильгэ сүүрэн 4-с миэстэлэннэ.
Константин Матаннанов «м5» бөлөххө (50-54) үгэс буолбут стилинэн 5 килэмиэтиргэ сүүрэн, 4-с миэстэ буолла.


Екатерина Семеновна кэпсээбитинэн, кинилэр бары быйыл тэриллибитэ 9 сылын туолар «Чысхаан» успуорт кулуубугар дьарыктаналлар. 70 чилиэннээх «чысхааннар» өрөспүүбүлүкэ күрэхтэһиилэриттэн саҕалаан, Арассыыйаҕа, аан дойдуга тиийэ сүүрэллэр. Онтон аҕам саастаах Николай Захаров -– успуорду таптааччы маастардар ортолоругар аан дойду чөмпүйүөнэ.

Бэтэрээн-спортсменнар сотору Бүтүн Арассыыйатааҕы кыһыҥҥы успуорт 2-с оонньууларыгар 18 киһилээх хамаанданан 4 күннээх күрэхтэһиигэ кыттыахтара. Манна даҕатан эттэххэ, күрэхтэһии ирдэбилинэн хамаанда 25 киһиттэн туруохтаах. Саха сирин хамаандатыгар 18 киһи сүүмэрдэннэ.
«Биһиги СӨ Успуорка министиэристибэтигэр улахан махталбытын этэбит. Министиэристибэ быйыл кыһыҥҥы оонньууларга барарбытыгар 10 киһи айанын ороскуотун аан бастакытын төлөөтө», -– диэн махталларын  тириэрдэллэр.


Екатерина Семеновна хайыһар успуордунан эдэр сааһыттан дьарыктанарын, элбэх киһини хайыһар успуордугар уһуйбутун билэбит. Николай Захаров «Бэтэрээн-хайыһардьыттар хаама сылдьар холобур дьоммут», -– диэн оруннаах этиитин ситэрэн,  Екатерина Семеновнаттан эмиэ сүбэ-соргу истиэхпин баҕарбыппар:
«Хайыһарынан дьарыктаныы киһи доруобай, чэгиэн, чэбдик сылдьарыгар улахан оруоллаах. Хайыһар — киһи доруобуйатын көннөрөр успуорт биир көрүҥэ. Дэлэҕэ былыргы сахалар: «Кыһын мунньуллубут туох баар куһаҕаны, туох баар ыарыыны барытын сааскы салгыҥҥа тахсан сайҕаан кэбис!» диэн этиэхтэрэ дуо? Ол аата биһиэхэ, Саха сиригэр олохтоох дьоҥҥо, хайыһарынан дьарыктаныы саамай наадалаах көрүҥ буолар. Биһиги сылы быһа, ол иһигэр сайын эмиэ дьарыктанабыт, нэдиэлэҕэ биир эмэ күн өрүөхпүтүн сөп», -– диэтэ.

Саха сирин бэтэрээн-спортсменнара хайыһары таптааччы 113 спортсмены кытары күөн көрсөн, ситиһии кынаттаммыттарынан ис сүрэхтэн эҕэрдэлиибит.

Уһук Илиҥҥи күрэхтэһиигэ Амур уобалаһыттан, Приморье, Хабаровскай кыраайдартан, Еврей автономнай уобалаһыттан кытыннылар.

Надежда ЕГОРОВА, «Саха сирэ» хаһыат , edersaas.ru

Е.НИКИТИНА хаартыскалара

+1
0
+1
0
+1
0
+1
0
+1
0
+1
0
+1
0