Спартакиада үөрүүлээх аһыллыытын режиссера, Саха циркэтин дириэктэрэ Сергей Расторгуев тэрээһин уратытын, онно туохха болҕомто ууруллубутун туһунан кэпсээтэ.
Саха сирин норуоттарын спортивнай оонньуулара Бороҕоҥҥо аан бастакытын 1996 сыллаахха үрдүк таһымнаахтык ыытыллыбыта. Быйыл уус алданнар күүтүүлээх тэрээһиҥҥэ бэлэмнэммиттэр, ох курдук оҥостубуттар. Улуус киинэ Бороҕон сибэккинэн симэммит, тротуара саҥардыллыбыт, суол оҥоһулла сылдьар, итиэннэ саҥа эбийиэктэр үлэҕэ киирэннэр, нэһилиэк көстүүтэ биллэ тупсубутун олохтоохтор, ыалдьыттар, спортсменнар бэлиэтииллэр.
Быйылгы оонньуулар сүрүн бэлиэлэринэн улуус гербэтигэр баар сылгы — Дьөһөгөй буолла. Тэрээһин үөрүүлээх аһыллыыта Дьөһөгөй «Майаҕатта Бэрт Хара» стадиоҥҥа кулунчук сүүрэн киириититтэн саҕаланар. Бу туһунан сүрүн тэрийээччи Сергей Расторгуев кэпсиир:
— Айылҕабыт баарын биллэрдэ, ол эрээри тэрээһиммит былааннаммыт бырагыраамата барыта буолар. Биллэн турар, алдьаммыты-кээһэммити оҥоробут, чөлүгэр түһэрэбит.
Уус Алдан улууһа чулуу спортсменнарынан, ааттаах-суоллаах күүстээхтэринэн, бэлитиичэскэй диэйэтэллэринэн аатырар. Аһыллыыга бу уратылары, көлүөнэлэр ситимнэһиилэрин бэлиэтээн көрдөрүөхпүт. Көрөөччүлэргэ саҥаны, сонуну эмиэ көрдөрүөхпүт. Өрө күүрүүлээхтик, ситиһиилээхтик ааһыаҕа диэн эрэнэбин. Манна маассабай сыаналарга 2500 олохтоох уонна артыыстар кыттыыны ылыахтара.
Санатан суруйдахха, алта күн устата 40 хамаандаттан 1800 спортсмен 16 көрүҥҥэ илин-кэлин түсүһүөхтэрэ: аэробикаҕа, буоксаҕа, стритболга, волейболга, гиирэ успуордугар, мини-футболга, ГТО многоборьетыгар, чэпчэки атлетикаҕа, остуол тенниһигэр, буулдьанан ытыыга, спортиҥҥа, спортивнай тустууга, оҕунан ытыыга, дуобакка, саахымакка. Манна барытыгар 206 мэтээл кэмпилиэгин оонньотуохтара.
Саха сирин норуоттарын спортивнай оонньууларын үөрүүлээх аһыллыыта бүгүн, от ыйын 5 күнүгэр, «Майаҕатта Бэрт Хара» стадиоҥҥа 20.00 чаастан буолуоҕа. Быһа эпиир «Саха» НКИХ ханаалыгар быһа көстүөҕэ.
Айтана Аммосова.
Мария Васильева хаартыскаҕа түһэриилэрэ.