Сүрүн Уопсастыба

Бүгүн — Кыыс оҕо күнэ

Бүгүн, алтынньы 11 күнүгэр, аан дойду үрдүнэн Кыыс оҕо күнэ бэлиэтэнэр. Кыыс оҕо – олох сибэккитэ, олоҕу тупсарар, киэргэтэр аналлаах. Бүгүн билиһиннэрэр киһим үс кыыс оҕолоох ийэ Луиза Васильева буолар. Кини Таатта улууһун Туора Күөл бөһүөлэгэр олорор.

«Биһиги дьиэ кэргэн үс оҕолоохпут. Бэйэм идэбинэн физкултуура учууталабын. Уһуйааҥҥа оҕолору дьарыктыыбын. Улахаммыт Аэлита 16 саастаах, Айгуль 12-лээх, Аделинабыт сэтинньигэ иккитин туолар. Улахан кыыспыт ырыанан дьарыктанар, орто кыыспыт успуордунан үлүһүйэр, кырабыт уһуйааҥҥа саҥа барда. Мин үлэм таһынан нэһилиэкпитигэр туорт оҥорон эбии дохуоттанабын.

Мин санаабар, кыыс оҕону кыра сааһыттан дьиэ үлэтигэр бэйэҕин кытта тэҥҥэ көмөлөһүннэрэр олус туһалаах. Мин кыргыттарбын оннук ииппит буоламмын, ханнык да үлэттэн толлон турбаттар, аһы да астыыллар, барыны бары гыналлар. Маны таһынан оҕолорум нэһилиэккэ, улууска буолар куонкурустарга, күрэхтэһиилэргэ барытыгар көхтөөхтүк кытталлар. Төрөппүт оруола оҕо сайдыытыгар улахан.

Онон эдэр ийэлэргэ сүбэм диэн, кыыс оҕону маанылаан, ол эрээри үлэҕэ сыһыаран иитэр туһалаах. Кыыс оҕо кэлин улаатан ийэ буоллаҕына, ийэтиттэн ылбыт сүбэтэ-амата, уопута олоҕор олус көмөлөөх», — диэн ыалдьыппыт Луиза Васильева дьиэ кэргэнин туһунан кэпсиир уонна өрөспүүбүлүкэ кыргыттарын, кыыс оҕолоохторун эҕэрдэлиир.

Ульяна ЗАХАРОВА.

0
0