Бүгүн 20 чаас туругунан, 102 бэйдиэ сылдьар ыты пууҥҥа тутан аҕаллылар
Бүгүн, ахсынньы 30 күнүгэр, киэһэ Дьокуускай куорат баһылыга Евгений Григорьев бэйдиэ сылдьар ыттары тутууга суһал ыстаап мунньаҕын ыытта.
Ыыттыллыбыт үлэ туһунан Дьокуускайдааҕы ыксаллаах быһыыга-майгыга управление начаалынньыга Николай Егоров кэпсээтэ. Ол курдук, бүгүн 20 чаас туругунан, бэйдиэ сылдьар кыыллары тутар пууҥҥа 67 ыты тутан аҕалбыттар, ол иһигэр Автодорожнай уокуруктан — 17 ыты. Ахсынньы 29 күнүгэр 35 ыты туппуттара, онтон түөрдэ Автодорожнай уокуруктан. Итинэн икки күн иһигэр уопсайа 102 бэйдиэ сылдьар ыты тутан пууҥҥа киллэрдилэр, онтон 21 ыта — Автодорожнай уокуруктан.
Санатан суруйдахха, бэҕэһээ Дьокуускай ипподромугар бэйдиэ сылдьар ыттар 53 саастаах дьахтарга саба түһэн тыыныгар турбуттара. Ол киэһэ суһал ыстаап тэриллэн, Автодорожнай уокурукка ыксаллаах быһыы-майгы биллэриллибитэ.
Бүгүн сарсыарда Комсомольскай болуоссакка куорат баһылыга Евгений Григорьев суһал ыстаап мунньаҕын ыытан, биригээдэлэр бэйдиэ сылдьар ыттары тутар үлэлэрин саҕалаабыттара. Бу туһунан Дьокуускай куорат дьаһалтатын пресс-сулууспата иһитиннэрэр.