— Бетукладин диэн лабыкта уонна хатыҥ субата састааптаах эмп айыллыбытын туһунан батсаап ситимигэр тарҕанар. Коронавирус дьаҥын эмтииргэ туһалаах дииллэр, атыыланар сирин ким да билбэт. Бу чахчы дуу, сымыйа дуу?
Т.И.Попова,
Дьокуускай куорат олохтооҕо.
Саха сиринээҕи биология институтун сүрүн научнай үлэһитэ, биология наукатын дуоктара, бэрэпиэссэр, академик Борис Моисеевич Кершенгольц:
— Бетукладин диэн биопрепарат патенын ааптара М.М. Шашурин, өссө 2018 сыллаахха айыллан килиниичэскэй тургутуктары, ол курдук ыараханнык уонна түргэнник сайдар вируснай гепатит В+Д көрүҥнэригэр бэрэбиэркэни ситиһиилээхтик ааспыта. Ону сэргэ, түбүркүлүөһү эмтииргэ эмиэ олус туһалааҕа дакаастанна. Бу вируһу утары охсуһар, сымнаҕастык дьайар (РНК – вирус тарҕаныытын аччатар) антибактериальнай, гепатопротекторнай (быары токсиннартан уонна антибиотик дьайыыларыттан) көмүскүүр, антитромбиновай дьайыылаах, киһи иммунитетын бөҕөргөтөр, хааны ыраастыыр аналлаах. Бетукладин киэҥ араҥаҕа атыылана илик. Ити батсаап ситимигэр тарҕаммытын туһунан тус бэйэбэр эмиэ суруйа сылдьыбыттара. Билигин бу препарат оҥоһуута тохтоон турар, оҥоруохпутун биир компонент тиийбэт, онон кыратык кэтэһэбит. Бу алтынньы ый ортотуттан, препараппытын (БАД) Москва куоракка бигэргэттэхтэринэ, патеннаан сибидиэтэлистибэлээтэхтэринэ эрэ, биирдэ аптека ситимин нөҥүө атыыланан саҕаланыаҕа.
Ульяна Захарова, edersaas.ru