Бокс уонна кик-бокс курдук спорт көрүҥнэрэ кыыс оҕоҕо сөбө суохтар диэн олохсуйбут өйдөбүл баар. Ол эрээри бу этиини утары барар кыргыттар суох буолбатахтар. Дьокуускай куорат 3 №-дээх оскуолатын ахсыс кылааһын үөрэнээччитэ Бэти Неустроева кик-боксанан дьарыктаммыта үһүс сылыгар барда, оттон боксанан үлүһүйбүтэ биир сыл буолла.
edersaas.ru
— Миигин кик-боксаҕа бастаан аҕам киллэрбитэ, бэйэни көмүскэнэ үөрэнэр наада диэн. Кэлин сөбүлээн дьарыктанар буолбутум, араас күрэстэргэ барытыгар кыттан, хотторуу да хомолтотун, кыайыы да өрөгөйүн биллим.
— Бастакы кыайыыҥ хайдах этэй?
— Аан бастаан кик-боксаҕа Нам улууһун Үөдэй нэһилиэгэр буолбут «Сааскы Эҥсиэли» күрэхтэһиигэ иккис миэстэни ылбытым. Онтон сиэттэрэн хайаан да кыайыахтаахпын, өссө эбии дьарыктаныахтаахпын диэн сыал туруорунан күн аайы дьиэбэр уонна дьарыкка эрчиллэр буолбутум. Дьиэбэр аҕам дьарыктыыр, кини урут оҕолору көҥүл тустууга уонна спорт араас көрүҥэр эрчийэрэ. Ол иһин, билигин дьиэбитигэр киэһэ аайы, сүрүннээн, күрэхтэһии буоларын саҕана дьарыктанабыт.
— Оттон ийэҥ оһоллонуоҥ диэн боппот дуо?
— Суох, кини төттөрүтүн миэхэ өйөбүл буолар. Хоттордохпуна, сылаас тылларынан уоскутар, өйүүр, миэхэ эрэнэр. Чугас дьонум эрэнэллэриттэн, кыайар эрэ туһугар буолбакка, дьоммун үөрдээри киирсэбин.
— Үөрэххэр мэһэйдэппэккин дуо? Хайдах барытын ситиһэҕин?
— Үөрэхпин кытта дьүөрэлии сатыыбын, мэһэйдэппэппин. Бастакы симиэнэҕэ үөрэнэр буоламмын, оскуолаттан кэлэн чэйдээн, дьиэбин сууйан-сотон баран дьарыкпар барабын, онтон уруоктарбын ааҕабын. Үөрэхпэр үчүгэйбин.
— Саамай киэн туттар ситиһиилэриҥ ханныктарый?
— Боксаҕа «Саха-Азия оҕолоро» норуоттар икки ардыларынааҕы оҕо пуондатын куубагар өрөспүүбүлүкэтээҕи турнирга иккис миэстэ буолбутум, кик-боксаҕа өрөспүүбүлүкэ куубагар бастаабытым. Эрчиллибитим тухары үстэ үһүс, түөртэ иккис миэстэни ылбытым, уон төгүл бастаатым.
— Боксанан төһө элбэх кыыс дьарыктанарый?
— Миигин кытта үс-түөрт кыыс буолан дьарыктанабыт.
— Мантан ураты өссө тугунан эмит дьарыктанаҕын дуо?
— Суох, быыс буллум да дьиэ үлэтигэр көмөлөһөбүн. Ийэбиттэн ас астыырга, эбээбиттэн иистэнэргэ үөрэнэбин, бырааттарбын боксаҕа эрчийэбин.
— Инникитин өссө эрчиллэр былааннааххын дуо?
— Бу икки көрүҥнэринэн салгыы дьарыктанар баҕалаахпын.
— Боксанан саҥа дьарыктанар кыргыттарга тугу баҕарыаҥ, сүбэлиэҥ этэй?
— Бары тулуурдаах буолуҥ, санааҕытын түһэрбэккэ иннигит хоту баран иһиҥ, хотторор түгэҥҥэ туохха сыыспыккытын, утарылаһааччыгыт техникатын аныгыскы сырыыга сыыспат туһугар көрүҥ диибин. Дьоллоох, доруобай буолуҥ!
—Бэти, кэпсээниҥ иһин махтал, үрдүктэн үрдүк ситиһиилэри баҕарабын.
Евдокия СЛЕПЦОВА, «Саха сирэ» хаһыат, edersaas.ru саайтыгар анаан