Бэтэринээрдэр Сибиир дьааспатыттан өлбүт сүөһү көмүллүбүт сирин чинчийэн көрдүлэр
Нуучча улуу луохтуура Иван Павлов: «Быраас киһини, оттон бэтэринээр киһи аймаҕы эмтииллэр» диэбитэ.
Бу дириҥ этиигэ бэтэринээрдэр үлэлэрин сүрүн ис хоһооно арыллар. Кырдьык, омос санаатахха, кинилэр дьон доруобуйатыгар сыһыана суох курдуктар эрээри, сүөһүттэн уонна кыылтан-сүөлтэн араас ыарыы тарҕанан, дьоҥҥо-сэргэҕэ үлүгэрдээх иэдээни таһаарар кутталлаах. Ити иһин бэтэринээрдэр сүөһү ыарыыта турбатын, ас-үөл куттала суох буоларын туһугар сэрэтэр-эмтиир үлэни тиһигин быспакка ыыталлар.
“Саха Өрөспүүбүлүэктин бэтэринээринэй сулууспатын эпизоотологическай мониториҥҥа уонна бухгалтерскай хааччыйыыга киинэ” хаһыанай тэрилтэ исписэлиистэрэ Өлөөн эбэҥки национальнай улууһун Бэтэринээринэй-чинчийэр лабораториялаах бэтэринээрийэҕэ управлениетын итиэннэ хапытаалынай тутууга уонна сиргэ-бас билиигэ сыһыаннаһыыга управлениетын үлэһиттэрин кытары соторутааҕыта Өлөөн уонна Кирбэй нэһилиэктэригэр баар Сибиир дьааспатыттан өлбүт сүөһүлэр көмүллүбүт сирдэрин чинчийэн көрдүлэр-иһиттилэр.
Бөһүөлэктэртэн тэйиччи сыталларын итиэннэ суоллара-иистэрэ суоҕун үрдүнэн барыта тоҕус көмүү чинчилиннэ. Олор бары бэтэринээринэй-санитарнай хаартыскалаахтар, сэрэтэр табличкалаахтар, ол эрээри, бүтэй маһынан күрүөлэммэтэхтэр. Чугаһынан кыыллар (тайах, бөрө уо.д.а.) суоллара-иистэрэ син көстүтэлиир. Көмүүлэр сөбүгэр үрдүк сиргэ оҥоһуллубут буоланнар, ууга ылларбатахтар, сир хайдыбыта эмиэ көстүбэт. Быһата, Сибиир дьааспатыттан өлбүт сүөһүлэр көмүллүбүт сирдэрэ ирдэбилгэ сөп түбэһэр, кутталы үөскэппэт эбит диэн Бэтэринээрийэ департамена иһитиннэрэр.
Раиса Сибирякова, «Саха сирэ» хаһыат, edersaas.ru