Трихофития эбэтэр модьуун – тирии сыстыганнаах ыарыыта буолар.
Киһиэхэ да сыстыан сөптөөх бу ыарыыны сүөһү тириитигэр төһө баҕарар өр кэмҥэ саһан сылдьар уонна тоҕоостоох кэмигэр тахсар тэллэйдэр көбүтэллэр. Бу тэллэйдэр тоҥорууну да, хатарыыны да билиммэттэр, арай аһаҕас күн уота кинилэри бохсор. Инньэ гынан модьуун сайын дэҥҥэ көстөр, оттон күһүн-кыһын сииктээх уонна кирдээх хотоҥҥо көбөн тахсар.
Дьэ ити иһин бэтэринээрдэр 1,5 – 4 ыйдаах ньирэйдэргэ модьууну утары былааннаах быһыыны биэрэллрэ. Амма улууһугар Абаҕатааҕы ветучаастак бэтэринээрдэрэ бэҕэһээ Кураанах диэн сайылыкка тахсаннар, «Илгэ» ХЭУо ньирэйдэригэр быһыы биэрдилэр.
Барыта 140 ньирэйгэ быһыы биэрдилэр. Ону таһынан титииги эмтээтилэр. Бу туһунан Бэтэринээрийэ департаменын пресс-сулууспата иһитиннэрэр.
Раиса Сибирякова, «Саха сирэ» edersaas.ru