Аҕа дойду сэриитин кыттыылаахтарыгар, инбэлииттэригэр уонна тыыл бэтэрээннэригэр тиис оҥортороллорун төлүөхтэрэ. Ирдэбилэ – Саха сиригэр бастайааннай олорор буолуохтаахтар.
Билиҥҥи туругунан, өрөспүүбүлүкэҕэ 69 сэрии кыттыылааҕа уонна 4485 тыыл бэтэрээнэ олороллор. Кинилэргэ 4 сылга биирдэ тиис быратыаһын оҥорторорго 15 тыһыынча солкуобайга тиийэ төлөбүр төлөнүөхтээх. Социальнай көмүскэл уорганнарыгар учуокка турбут эбит буоллаҕына, бу иннинээҕи 4 сыл иһигэр оҥорторбут буоллахтарына, ол ороскуоттара эмиэ төлөнөр.
Маннык төлөбүрү ылар туһуттан, бэтэрээннэр социальнай көмүскэл управлениетыгар сайабылыанньа суруйуохтаахтар уонна балыыһа биэрбит чегин көрдөрүөхтээхтэр. Маннык сайабылыанньаны управлениеҕа тиийэн, эбэтэр буостанан, эбэтэр “Госуслуги” портал нөҥүө электроннай көрүҥүнэн биэриэххэ сөп.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.