Саҥа дьыл аптаах бырааһынньыгын сааһыттан тутулуга суох күүтэллэр, туох эрэ уһулуччулааҕы эрэнэ кэтэһэллэр.
Бүгүн сибээс техникумугар Дьокуускай куорат бэтэрээннэрин Саҥа дьылы көрсөр үөрүүлээх тэрээһиннэрэ буолла.
— Дьокуускай куораттааҕы «Катюша» бэтэрээннэр кулууптарын чилиэннэрин, Үһүс көлүөнэ оскуолатын, Аҕыйах ахсааннаах төрүт олохтоох норуоттар бэтэрээннэрин кытта Киинэ сылын түмүктүүр киэһэҕэ мустан, бириэмэбитин билбэккэ атаардыбыт. Таһырдьа төһө да тымныытын иһин, үгүс саастаах дьон мустан, үҥкүүнү көҕүлүттэн туттубут, Тымныы оҕонньору кытта харыйа тула хоробуоттаан ыллыбыт, — диэн кэпсиир киинэ үлэтин уонна уус-уран самодеятельность бэтэрээнэ, Хаарчаана оруолун толорооччу Валентина Прокопьева.
Уопсастыбаннай олоххо көхтөөх ытык кырдьаҕастарбыт бу күн оҕо саастарын уонна эдэр эрчимнээх кэмнэрин эргитэн, бэркэ сынньанан тарҕастылар.
Елена ПОТОЦКАЯ, edersaas.ru